Paippalāda-Saṃhitā · Chapter 19.15

saṃ jānatāṃ manasā saṃ cikitvā
mā yutsata manyunā daivyena |
mā ghoṣa utthād bahule
vinirhate meṣuḥ paptad
indrasyāhany āgate ||

saṃ vo manāṃsi saṃ vratā
sam ākūtīr nayāmasi |
ime ye vivratā stha
tān vaḥ saṃ jñapayāmasi ||

saṃjñapanaṃ vo manaso
atho saṃ jñapanaṃ hṛdaḥ |
atho bhagasya yac chrāntaṃ
tena saṃ jñapayāti vaḥ ||

saṃ vaḥ pṛcyantāṃ tanvaḥ
saṃ manāṃsi sam u tvacaḥ |
saṃ vo brahmaṇaspatiḥ
somaḥ saṃ jñapayāti vaḥ ||

saṃjñānaṃ naḥ svebhyaḥ
saṃjñānam araṇebhyaḥ |
saṃjñānam aśvinā yuvam
ihāsmāsu ni yacchatam ||

yathādityā vasavaḥ saṃbabhūvur
marudbhir ugrā ahṛṇīyamānāḥ |
evā triṇāmann ahṛṇīyamāna
imaṃ janaṃ saṃmanasaṃ kṛṇu tvam ||

nir amun nuda okasaḥ
sapatno yaḥ pṛtanyati |
nirbādhyena haviṣā-
-indra enaṃ parāśarīt ||

ihi tisraḥ parāvata
ihi pañca janām̐ ati |
ihi saptāti rocanā
yāvat sūryo asad divi ||

paramāṃ tvā parāvatam
indro devo ajīgamat |
yathā na punar āyasi
śaśvatībhyaḥ samābhyaḥ ||

pratīcīnaphalo hi tvam
apāmārga babhūvitha |
sarvān mac chapathām̐ adhi
varīyo yāvayā tvam ||

yac ca bhrātṛvyaḥ śapati
yac ca jāmiḥ śapāti naḥ |
brahmā yan manyutaḥ śapāt
sarvaṃ tan no adhaspadam ||

aghadviṣṭā devajūtā
vīruc chapathayāvanī |
udnā malam ivāvānaik
sarvān mac chapathām̐ adhi ||

yad enaṃ pariṣīdanti
samādadhati cakṣase |
saṃpreddho agnir jihvābhir
ud eti hṛdayād adhi ||

agneḥ sāntapanasyāham
āyuṣe padam ā rabhe |
addhātir yasya paśyati
dhūmam udyantam āsyataḥ ||

yo asya samidhaṃ veda
kṣatriyeṇa samāhitām |
nābhihvāre padaṃ
ni dadhāti sa mṛtyave ||

nainaṃ ghnanti paryāyiṇo
na sannām̐ ava gacchati |
agner yaḥ kṣatriyo vidvān
nāma gṛhṇāty āyuṣe ||