Paippalāda-Saṃhitā · Chapter 19.14

yathāyaṃ vāho aśvinā
samaiti saṃ ca vartate |
evā mām abhi te manaḥ
samaitu saṃ ca vartatām ||

ahaṃ khidāmi te mano
rājāśvaḥ pṛṣṭyām iva |
reṣmacchinnaṃ yathā tṛṇaṃ
mayi te veṣṭatāṃ manaḥ ||

āñjanasya madhughasya
kuṣṭhasya naladasya ca |
turo bhagasya hastābhyām
anurodhanam ā bhare ||

ayam ā yāty aryamā
purastād viṣitastukaḥ |
sa icchād agruvai patim
atho jāyām ajānaye ||

aśramad iyam aryamann
anyāsāṃ samanaṃ yatī |
aṅgo nv asyā aryamann
anyā samanam āyati ||

dhātā dādhāra pṛthivīṃ
dhātā dyām uta sūryam |
dhātāsyā agruvai patiṃ
dadhātu pratikāmyam ||

mahyam āpo madhumad erayanta
mahyaṃ sūryo abharaj jyotiṣā kam |
mahyaṃ devā uta viśve tapojā
mahyaṃ devaḥ savitā vyaco dhāt ||

ahaṃ dādhāra pṛthivīm uta dyām
ahaṃ sindhūn ajanaṃ sapta sākam |
ahaṃ satyam anṛtaṃ yad vadāmy
ahaṃ vācaṃ pari sarvām iṣiṃ ca ||

ahaṃ vivyajmi pṛthivīm uta dyām
aham ṛtūn asṛje sapta sākam |
ahaṃ vācaṃ pari sarvāṃ babhūva
yo agnīṣomāv ajuṣe sakhāyau ||

anaḍudbhyo naḥ prathamaṃ
dhenubhyas tvam arundhati |
adhenave vayase
śarma yaccha catuṣpade ||

śarma yacchāty oṣadhiḥ
saha devair arundhatī |
karat payasvantaṃ goṣṭham
ayakṣmām̐ uta pūruṣān ||

viśvarūpāṃ subhagām
acchā vadāmi jīvalām |
sā no rudrasyāstāṃ hetiṃ
dūraṃ nayatu gobhyaḥ ||

yamo mṛtyur aghamāro nirṛtho
bhavaḥ śarvo astā nīlaśikhaṇḍī |
devajanāḥ senām uttasthivāṃsas
te asmākaṃ pari vṛñjantu vīrān ||

manasā homair harasā ghṛtena
śarvāyāstra uta rājñe bhavāya |
namasyebhyo nama ebhyaḥ kṛṇomy
anyatrāsmad aghaviṣā nayantu ||

trāyadhvaṃ no aghaviṣābhyo vadhād
agnīṣomā marutaḥ pūtadakṣāḥ |
viśve devā maruto vaiśvadevā
vātāparjanyayoḥ sumatau syāma ||