Paippalāda-Saṃhitā · Chapter 19.13

abhi tvendro varimataḥ
purā tvāṃhūraṇebhyaḥ |
hvayāmy ugraṃ cettaraṃ
puruṇāmānam ekajam ||

yo adya senyo vadho
jighāṃsan na udīrate |
indrasya tatra bāhū
samantaṃ pari dadhmahe ||

pari dadhma indrasya bāhū
samantaṃ trātus trāyatāṃ naḥ |
deva savitaḥ soma rājan
sumanasaṃ mā kṛṇutaṃ svastaye ||

devā aduḥ sūryo adād
dyaur adāt pṛthivy adāt |
sarvāḥ sarasvatīr aduḥ
sacittā viṣadūṣaṇam ||

yad vo devā upajīkā
āsiñcan dhanvany udakam |
tena devaprasūtā
idaṃ dūṣayatā viṣam ||

asurāṇām asi duhitā
devānām asi svasā |
divas pṛthivyā jajñiṣe
sā cakarthārasaṃ viṣam ||

asthisraṃsaṃ parusraṃsam
āsthitaṃ hṛdayāmayam |
balāsaṃ sarvaṃ niṣ kṛdhy
aṅgeṣṭhā yaś ca parvasu ||

nir balāsaṃ balāsinaḥ
kṣiṇomi puṣkaraṃ yathā |
chinadmy asya bandhanaṃ
mūlam urvārvo yathā ||

nir balāsetaḥ pra pata
suparṇo vasater iva |
adheṭa iva hāyano
'pa drāhy avīrahā ||

ā vṛṣāyasva śvasihi
vardhasva prathayasva ca |
yathāṅgaṃ vardhatāṃ te śepas
tena yoṣitam uj jahi ||

yenā kṛśaṃ medayanti
yena hinvanty āturam |
tenāsya brahmaṇaspate
dhanur ivā tānayā pasaḥ ||

āhaṃ tanomi te paso
adhi jyām iva dhanvani |
kramasva riśya iva rohitam
anavaglāyatā tvam ||

devāḥ kapota iṣito yad icchan
dūto nirṛtyā idam ājagāma |
tasmā arcāma kṛṇavāma niṣkṛtiṃ
śaṃ no astu dvipade catuṣpade ||

śivaḥ kapota iṣito no astv
anāgā devāḥ śakuno gṛhe naḥ |
agnir hi vipro juṣatāṃ havir naḥ
pari hetiḥ pakṣiṇī no vṛṇaktu ||

hetiḥ pakṣiṇī na dabhāty asmān
āṣṭrī padaṃ kṛṇute agnidhāne |
śaṃ no gobhya uta puruṣebhyo
mā no devā iha hiṃsīt kapotaḥ ||

iṣaṃ madantaḥ pari gāṃ nayāmaḥ
saṃyopayanto duritā padāni |
ṛcā kapotaṃ nudata praṇodaṃ
hitvā na ūrjaṃ pra patāt patiṣṭhaḥ ||

nude tvā pra ṇude tvā
kapota rakṣasā saha |
yato na punar āyasi
tatra tvā gamayāmasi ||