પૈપ્પલાદ-સંહિતા · અધ્યાય 19.13

અભિ ત્વેન્દ્રો વરિમતઃ
પુરા ત્વાંહૂરણેભ્યઃ ।
હ્વયામ્ય્ ઉગ્રં ચેત્તરં
પુરુણામાનમ્ એકજમ્ ॥

યો અદ્ય સેન્યો વધો
જિઘાંસન્ ન ઉદીરતે ।
ઇન્દ્રસ્ય તત્ર બાહૂ
સમન્તં પરિ દધ્મહે ॥

પરિ દધ્મ ઇન્દ્રસ્ય બાહૂ
સમન્તં ત્રાતુસ્ ત્રાયતાં નઃ ।
દેવ સવિતઃ સોમ રાજન્
સુમનસં મા કૃણુતં સ્વસ્તયે ॥

દેવા અદુઃ સૂર્યો અદાદ્
દ્યૌર્ અદાત્ પૃથિવ્ય્ અદાત્ ।
સર્વાઃ સરસ્વતીર્ અદુઃ
સચિત્તા વિષદૂષણમ્ ॥

યદ્ વો દેવા ઉપજીકા
આસિઞ્ચન્ ધન્વન્ય્ ઉદકમ્ ।
તેન દેવપ્રસૂતા
ઇદં દૂષયતા વિષમ્ ॥

અસુરાણામ્ અસિ દુહિતા
દેવાનામ્ અસિ સ્વસા ।
દિવસ્ પૃથિવ્યા જજ્ઞિષે
સા ચકર્થારસં વિષમ્ ॥

અસ્થિસ્રંસં પરુસ્રંસમ્
આસ્થિતં હૃદયામયમ્ ।
બલાસં સર્વં નિષ્ કૃધ્ય્
અઙ્ગેષ્ઠા યશ્ ચ પર્વસુ ॥

નિર્ બલાસં બલાસિનઃ
ક્ષિણોમિ પુષ્કરં યથા ।
છિનદ્મ્ય્ અસ્ય બન્ધનં
મૂલમ્ ઉર્વાર્વો યથા ॥

નિર્ બલાસેતઃ પ્ર પત
સુપર્ણો વસતેર્ ઇવ ।
અધેટ ઇવ હાયનો
ઽપ દ્રાહ્ય્ અવીરહા ॥

આ વૃષાયસ્વ શ્વસિહિ
વર્ધસ્વ પ્રથયસ્વ ચ ।
યથાઙ્ગં વર્ધતાં તે શેપસ્
તેન યોષિતમ્ ઉજ્ જહિ ॥

યેના કૃશં મેદયન્તિ
યેન હિન્વન્ત્ય્ આતુરમ્ ।
તેનાસ્ય બ્રહ્મણસ્પતે
ધનુર્ ઇવા તાનયા પસઃ ॥

આહં તનોમિ તે પસો
અધિ જ્યામ્ ઇવ ધન્વનિ ।
ક્રમસ્વ રિશ્ય ઇવ રોહિતમ્
અનવગ્લાયતા ત્વમ્ ॥

દેવાઃ કપોત ઇષિતો યદ્ ઇચ્છન્
દૂતો નિરૃત્યા ઇદમ્ આજગામ ।
તસ્મા અર્ચામ કૃણવામ નિષ્કૃતિં
શં નો અસ્તુ દ્વિપદે ચતુષ્પદે ॥

શિવઃ કપોત ઇષિતો નો અસ્ત્વ્
અનાગા દેવાઃ શકુનો ગૃહે નઃ ।
અગ્નિર્ હિ વિપ્રો જુષતાં હવિર્ નઃ
પરિ હેતિઃ પક્ષિણી નો વૃણક્તુ ॥

હેતિઃ પક્ષિણી ન દભાત્ય્ અસ્માન્
આષ્ટ્રી પદં કૃણુતે અગ્નિધાને ।
શં નો ગોભ્ય ઉત પુરુષેભ્યો
મા નો દેવા ઇહ હિંસીત્ કપોતઃ ॥

ઇષં મદન્તઃ પરિ ગાં નયામઃ
સંયોપયન્તો દુરિતા પદાનિ ।
ઋચા કપોતં નુદત પ્રણોદં
હિત્વા ન ઊર્જં પ્ર પતાત્ પતિષ્ઠઃ ॥

નુદે ત્વા પ્ર ણુદે ત્વા
કપોત રક્ષસા સહ ।
યતો ન પુનર્ આયસિ
તત્ર ત્વા ગમયામસિ ॥