Paippalāda-Saṃhitā · Chapter 19.12

śamīm aśvattha ārūḍhas
tatra puṃsavanaṃ kṛtam |
tad eva tasya bheṣajaṃ
yat strīṣv ā haranti tat ||

puṃsi vai reto bhavati
tat striyām anu ṣicyate |
tad vai putrasya vedanaṃ
tat prajāpatir abravīt ||

prajāpatir anv amaṃsta
sinīvāly acīkl̥pat |
straiṣūyam anyatra dadhat
pumāṃsam u dadhad iha ||

yā oṣadhayaḥ somarājñīr ity ekā

muñcantu mā śapathyād
atho varuṇyād uta |
atho yamasya paḍbīśād
viśvasmād devaduṣkṛtāt ||

yac cakṣuṣā yan manasā
yac ca vācopārima
yaj jāgrato yat svapantaḥ |
somo mā tasmād enasaḥ
svadhayā punātu vidvān ||

abhibhūr yajño abhibhūr agnir astv
abhibhūḥ somo abhibhūr indro astu |
abhy ayaṃ viśvāḥ pṛtanā yathāsad
evā vidhemāgnihotrā idaṃ haviḥ ||

svadhāstu mitrāvaruṇā prajāvat
kṣatraṃ madhveha pinvatam |
bādhethāṃ dveṣo nirṛtiṃ parācair
asmai kṣatraṃ varca ā dhattam ojaḥ ||

imaṃ vīram ity ekā ||

agner iva prasitir asya śuṣmiṇa
uteva matto vilapann apāyati |
tasmai te aruṇāya babhrave
tapurmaghāya namo 'stu takmane ||

namo yamāya namo 'stu mṛtyave
namo rājñe varuṇāya tviṣīmate |
namaḥ kṣetrasya pataye namo dive
namaḥ pṛthivyai nama oṣadhībhyaḥ ||

ayaṃ yo janān haritān kṛṇoty
ucchocayann agninevābhidunvan |
adhā hi takmann araso hi bhūyā
athā nyaṅ adharaṅ vā parehi ||

indro jayāti na parā jayātā
adhirājo rājasu rājayātai |
carkṛtya īḍyaḥ śaṃsyaś ca-
-upasadyo namasyo bhaveha ||

tvam indrādhirājaḥ śravasyus
tvaṃ bhavābhibhūtir janānām |
tvaṃ daivīr viśa imā vi rāja-
-āyuṣmat kṣatram ajaraṃ te astu ||

prācyāṃ diśi tvam indrādhirājā-
-odīcyāṃ diśi vṛtrahan dasyuhāsi |
yatra yanti śrotyās taj jitaṃ te
dakṣiṇato vṛṣabho 'si havyaḥ ||