પૈપ્પલાદ-સંહિતા · અધ્યાય 19.12

શમીમ્ અશ્વત્થ આરૂઢસ્
તત્ર પુંસવનં કૃતમ્ ।
તદ્ એવ તસ્ય ભેષજં
યત્ સ્ત્રીષ્વ્ આ હરન્તિ તત્ ॥

પુંસિ વૈ રેતો ભવતિ
તત્ સ્ત્રિયામ્ અનુ ષિચ્યતે ।
તદ્ વૈ પુત્રસ્ય વેદનં
તત્ પ્રજાપતિર્ અબ્રવીત્ ॥

પ્રજાપતિર્ અન્વ્ અમંસ્ત
સિનીવાલ્ય્ અચીક્લ્̥પત્ ।
સ્ત્રૈષૂયમ્ અન્યત્ર દધત્
પુમાંસમ્ ઉ દધદ્ ઇહ ॥

યા ઓષધયઃ સોમરાજ્ઞીર્ ઇત્ય્ એકા

મુઞ્ચન્તુ મા શપથ્યાદ્
અથો વરુણ્યાદ્ ઉત ।
અથો યમસ્ય પડ્બીશાદ્
વિશ્વસ્માદ્ દેવદુષ્કૃતાત્ ॥

યચ્ ચક્ષુષા યન્ મનસા
યચ્ ચ વાચોપારિમ
યજ્ જાગ્રતો યત્ સ્વપન્તઃ ।
સોમો મા તસ્માદ્ એનસઃ
સ્વધયા પુનાતુ વિદ્વાન્ ॥

અભિભૂર્ યજ્ઞો અભિભૂર્ અગ્નિર્ અસ્ત્વ્
અભિભૂઃ સોમો અભિભૂર્ ઇન્દ્રો અસ્તુ ।
અભ્ય્ અયં વિશ્વાઃ પૃતના યથાસદ્
એવા વિધેમાગ્નિહોત્રા ઇદં હવિઃ ॥

સ્વધાસ્તુ મિત્રાવરુણા પ્રજાવત્
ક્ષત્રં મધ્વેહ પિન્વતમ્ ।
બાધેથાં દ્વેષો નિરૃતિં પરાચૈર્
અસ્મૈ ક્ષત્રં વર્ચ આ ધત્તમ્ ઓજઃ ॥

ઇમં વીરમ્ ઇત્ય્ એકા ॥

અગ્નેર્ ઇવ પ્રસિતિર્ અસ્ય શુષ્મિણ
ઉતેવ મત્તો વિલપન્ન્ અપાયતિ ।
તસ્મૈ તે અરુણાય બભ્રવે
તપુર્મઘાય નમો ઽસ્તુ તક્મને ॥

નમો યમાય નમો ઽસ્તુ મૃત્યવે
નમો રાજ્ઞે વરુણાય ત્વિષીમતે ।
નમઃ ક્ષેત્રસ્ય પતયે નમો દિવે
નમઃ પૃથિવ્યૈ નમ ઓષધીભ્યઃ ॥

અયં યો જનાન્ હરિતાન્ કૃણોત્ય્
ઉચ્છોચયન્ન્ અગ્નિનેવાભિદુન્વન્ ।
અધા હિ તક્મન્ન્ અરસો હિ ભૂયા
અથા ન્યઙ્ અધરઙ્ વા પરેહિ ॥

ઇન્દ્રો જયાતિ ન પરા જયાતા
અધિરાજો રાજસુ રાજયાતૈ ।
ચર્કૃત્ય ઈડ્યઃ શંસ્યશ્ ચ-
-ઉપસદ્યો નમસ્યો ભવેહ ॥

ત્વમ્ ઇન્દ્રાધિરાજઃ શ્રવસ્યુસ્
ત્વં ભવાભિભૂતિર્ જનાનામ્ ।
ત્વં દૈવીર્ વિશ ઇમા વિ રાજ-
-આયુષ્મત્ ક્ષત્રમ્ અજરં તે અસ્તુ ॥

પ્રાચ્યાં દિશિ ત્વમ્ ઇન્દ્રાધિરાજા-
-ઓદીચ્યાં દિશિ વૃત્રહન્ દસ્યુહાસિ ।
યત્ર યન્તિ શ્રોત્યાસ્ તજ્ જિતં તે
દક્ષિણતો વૃષભો ઽસિ હવ્યઃ ॥