Paippalāda-Saṃhitā · Chapter 18.9

yadā gārhapatyam asaparyait
pūrvam agniṃ vadhūr iyam |
adhā sarasvatyai nāri
pitṛbhyaś ca namas kuru ||

carma varmaitad ā hara-
-asyai nāryā upastire |
sinīvāli pra jāyatāṃ
bhagasya sumatāv asat ||

upa stṛṇīhi balbajam
adhi carmaṇi rohite |
tatropaviśya suprajā
imam agniṃ saparyatu ||

yaṃ balbajaṃ nyasyatha
carma copastṛṇīthana |
tad ā rohatu suprajā
yā kanyā vindate patim ||

ā roha carmopa sīdāgnim
eṣa devo hanti rakṣāṃsi sarvā |
sumaṅgaly upa sīdemam agniṃ
saṃpatnī prati bhūṣeha devān ||

pra jāyantāṃ mātur asyā upasthān
nānārūpāḥ paśavo jāyamānāḥ |
iha prajāṃ janaya patye asmai
sujyaiṣṭhyo bhavatu te putra eṣaḥ ||

sumaṅgalī prataraṇī gṛhāṇāṃ
suśeva patye śvaśurāya śambhūḥ |
syonā śvaśruvai pra gṛhān viśemān
prajāvatī jaradaṣṭir yathāsaḥ ||

sumaṅgalīr iyaṃ vadhūr
imāṃ sameta paśyata |
saubhāgyam asyai dattvā
daurbhāgyena paretana ||

yā durhārdo yuvatayo
yāś ceha jaratīr api |
varco hy asyai saṃ dattā-
-athāstaṃ vi paretana ||

rukmaprastaraṇaṃ vahyaṃ
viśvā rūpāṇi bibhratam |
ārohat sūryā sāvitrī
bṛhate saubhagāya kam ||