પૈપ્પલાદ-સંહિતા · અધ્યાય 18.9

યદા ગાર્હપત્યમ્ અસપર્યૈત્
પૂર્વમ્ અગ્નિં વધૂર્ ઇયમ્ ।
અધા સરસ્વત્યૈ નારિ
પિતૃભ્યશ્ ચ નમસ્ કુરુ ॥

ચર્મ વર્મૈતદ્ આ હર-
-અસ્યૈ નાર્યા ઉપસ્તિરે ।
સિનીવાલિ પ્ર જાયતાં
ભગસ્ય સુમતાવ્ અસત્ ॥

ઉપ સ્તૃણીહિ બલ્બજમ્
અધિ ચર્મણિ રોહિતે ।
તત્રોપવિશ્ય સુપ્રજા
ઇમમ્ અગ્નિં સપર્યતુ ॥

યં બલ્બજં ન્યસ્યથ
ચર્મ ચોપસ્તૃણીથન ।
તદ્ આ રોહતુ સુપ્રજા
યા કન્યા વિન્દતે પતિમ્ ॥

આ રોહ ચર્મોપ સીદાગ્નિમ્
એષ દેવો હન્તિ રક્ષાંસિ સર્વા ।
સુમઙ્ગલ્ય્ ઉપ સીદેમમ્ અગ્નિં
સંપત્ની પ્રતિ ભૂષેહ દેવાન્ ॥

પ્ર જાયન્તાં માતુર્ અસ્યા ઉપસ્થાન્
નાનારૂપાઃ પશવો જાયમાનાઃ ।
ઇહ પ્રજાં જનય પત્યે અસ્મૈ
સુજ્યૈષ્ઠ્યો ભવતુ તે પુત્ર એષઃ ॥

સુમઙ્ગલી પ્રતરણી ગૃહાણાં
સુશેવ પત્યે શ્વશુરાય શમ્ભૂઃ ।
સ્યોના શ્વશ્રુવૈ પ્ર ગૃહાન્ વિશેમાન્
પ્રજાવતી જરદષ્ટિર્ યથાસઃ ॥

સુમઙ્ગલીર્ ઇયં વધૂર્
ઇમાં સમેત પશ્યત ।
સૌભાગ્યમ્ અસ્યૈ દત્ત્વા
દૌર્ભાગ્યેન પરેતન ॥

યા દુર્હાર્દો યુવતયો
યાશ્ ચેહ જરતીર્ અપિ ।
વર્ચો હ્ય્ અસ્યૈ સં દત્તા-
-અથાસ્તં વિ પરેતન ॥

રુક્મપ્રસ્તરણં વહ્યં
વિશ્વા રૂપાણિ બિભ્રતમ્ ।
આરોહત્ સૂર્યા સાવિત્રી
બૃહતે સૌભગાય કમ્ ॥