Paippalāda-Saṃhitā · Chapter 18.10

ā roha talpaṃ sumanasyamānā-
-iha prajāṃ janaya patye asmai |
indrāṇīva subudhā budhyamānā
jyotirugrā uṣasaḥ prati jāgaraḥ ||

devā agre ny apadyanta patnīṃ
sam aspṛśanta tanvas tanūbhiḥ |
sūryeva nāri viśvarūpā mahitvā
prajāvatī patye śaṃ bhavāsi ||

ud īrṣvātaḥ pativatnī hy eṣā
viśvāvasuṃ namasā gīrbhir īḍe |
jāmim iccha pitṛṣadaṃ nyaktāṃ
sa te bhāgo januṣā tasya viddhi ||

yā apsarasaḥ sadhamādaṃ madanty
antarā havirdhānaṃ sūryaṃ ca |
tās te janitram abhi tāḥ parehi
namas te gandharva rtunā kṛṇomi ||

namo ghandharvasya manase
namo bhāmāya cakṣuṣe ca kṛṇmaḥ |
viśvāvaso namo brahmaṇā te kṛṇomy
abhi jāyā apsarasaḥ parehi ||

rāyā vayaṃ sumanasaḥ syāma-
-ud ito gandharvam āvīvṛtāma |
agan sa devaḥ paramaṃ sadhastham
aganma vayaṃ pratiranta āyuḥ ||

saṃ pitarāv ṛtviye sṛjethāṃ
pitā mātā ca retaso bhavāthaḥ |
maryo yoṣām adhi rohayaitāṃ
prajāṃ kṛṇvāthām iha modamānau ||

ā vāṃ prajāṃ janayatu prajāpatir
ahorātrābhyāṃ sam anaktv aryamā |
adurmaṅgalī patilokam ā viśemaṃ
śaṃ no bhava dvipade śaṃ catuṣpade ||

tāṃ pūṣañ chivatamām erayasva
yasyāṃ bījaṃ manuṣyā vapanti |
yā na ūrū uśatī viśrayāti
yasyām uśantaḥ praharema śepaḥ ||

ā rohorum upa dhatsva hastaṃ
pari ṣvajasva jāyāṃ sumanasyamānaḥ |
prajāṃ kṛṇvāthām iha puṣyataṃ rayiṃ
dīrghaṃ vām āyuḥ savitā kṛṇotu ||