Paippalāda-Saṃhitā · Chapter 18.74

ye satyāso havirado haviṣyā
indreṇa devaiḥ sarathaṃ dadhānāḥ |
āgne yāhi sahasraṃ devavandaiḥ
paraiḥ pūrvaiḥ pitṛbhir gharmasadbhiḥ ||

upa sarpa mātaraṃ bhūmim etām
uruvyacasaṃ pṛthivīṃ suśevām |
ūrṇamradāḥ pṛthivī dakṣiṇāvata
eṣā tvā pātu nirṛter upasthāt ||

uc chvañcasva pṛthivi mā ni bādhathāḥ
sūpāyanāsmai bhava sūpavañcanā |
mātā putraṃ yathā sicā-
-abhy enaṃ bhūma ūrṇuhi ||

ucchvañcamānā pṛthivī su tiṣṭhatu
sahasraṃ mita upa hi śrayantām |
te gṛhāso ghṛtaścutaḥ syonā
viśvāhāsmai śaraṇāḥ santv atra ||

ut te stabhnāti pṛthivīṃ tvat pari-
-imaṃ lokaṃ vidadhan mo aharṣam |
etāṃ sthūṇāṃ pitaro dhārayantv
atrā yamaḥ sadanā te kṛṇotu ||

atharvā pūrṇaṃ camasaṃ
yam indrāyābibhar vājinīvate |
tasmin kṛṇotu sukṛtasya lokaṃ
tasminn induḥ pavate viśvadānīm ||

amum agne camasaṃ mā vi jijñaraḥ
priyo devānām upa somyānām |
eṣa yaś camaso devapānas
tasminn evā amṛtā mādayante ||

yat te kṛṣṇaḥ śakuna ātutoda
pipīlaḥ sarpa uta vā śvāpadaḥ |
agniṣ ṭad viśvād ā pṛṇātu vidvān
somaś cā yo brāhmaṇām̐ āviveśa ||

payasvatīr oṣadhayaḥ
payasvān māmakaṃ vacaḥ |
atho payasvad yat payas
tena mā saha jinvatha ||

imā narīty ekā ||