Paippalāda-Saṃhitā · Chapter 18.75

saṃ gacchasva pitṛbhiḥ saṃ yamena-
-iṣṭāpūrtena parame vyoman |
hitvāvadyaṃ punar astam ehi
saṃ gacchasva tanvā suvarcāḥ ||

ye agnidagdhā ye 'nagnidagdhā
madhye divaḥ svadhayā mādayante |
tebhyaḥ svarāḍ asunītim etāṃ
yathāvaśaṃ tanvaṃ kalpayāti ||

ā rabhasva jātavedas
tejasvad dharo astu te |
śarīram asya saṃ daha-
-athainaṃ dhehi sukṛtām uloke ||

punar dehi vanaspate
ya eṣa nihitas tvayi |
yathā yamasādana
āsātai vidathā vadan ||

śaṃ te nihāro bhavatu
śaṃ te pṛṣṭhāva śīyatām |
śītike śītikāvaty
ahlādake hlādakāvati |
maṇḍūkyāpsu saṃ bhava
imaṃ sv agniṃ śamaya ||

vivasvān no 'bhayaṃ kṛṇotu
paraitu mṛtyur amṛtaṃ na aitu |
iha me vīrā bahavo bhavantv
aśvāvad goman mayy astu puṣṭam ||

vivasvān no 'mṛtatve dadhātu
yaḥ sutrāmā jīradānuḥ sudānuḥ |
imān rakṣaḥ puruṣān ā jarimṇo
mo ṣv eṣām asavo yamaṃ guḥ ||

yo dadhre antarikṣeṇa mahnā
pitṝṇāṃ kaviḥ pramatir matīnām |
tam arcata viśvamitrā havirbhiḥ
sa no yamaḥ prataraṃ jīvase dhāt ||

ā rohata divam uttamām
ṛṣayo mā bibhītana |
somapāḥ somapāyina
idaṃ vaḥ kriyate havir
aganma jyotir uttamam ||

pra ketuna bṛhatā bhāty agnir
ā rodasī vṛṣabho roravīti |
divaś cid antām̐ upamām̐ ud ānaḍ
apām upasthe mahiṣo vavardha ||

nāke suparṇam upa yat patantaṃ
hṛdā venanto abhyacakṣata tvā |
hiraṇyapakṣaṃ varuṇasya dūtaṃ
yamasya yonau śakunaṃ bhuraṇyam ||

indra kratuṃ na ā bhara
pitā putrebhyo yathā |
śikṣā ṇo asmin puruhūta vājini
jīvā jyotir aśīmahi ||

ye te pūrva ity ekā ||