Scripture Library

Paippalāda-Saṃhitā · Chapter 18.65

18.65.1

ye yudhyante pradhaneṣu
śūrāso ye tanūtyajaḥ |
ye vā sahasradakṣiṇās
taṃś cid evāpi gacchatāt ||

18.65.2

syonāsmai pṛthivī bhava-
-anṛkṣarā niveśinī |
yacchāsmai śarma saprathāḥ ||

18.65.3

asaṃbādhe pṛthivyā
urau loke mahīyate |
svadhā yāś cakṛṣe jīvaṃ
tās te santu madhuścutaḥ ||

18.65.4

hvayāmi te namasā ma
imaṃ gṛham upa jujuṣāṇa ehi |
saṃ gacchasva pitṛbhir yac ca dattaṃ
syonās tvā vātā upa vāntu śagmāḥ ||

18.65.5

ā tvā vahantu maruta
udavāhā udaplutaḥ |
ajena kṛṇvantaḥ śītaṃ
varṣeṇo yantu bāl iti ||

18.65.6

ud ahvam āyur āyuṣe
kratve dakṣāya jīvase |
svāṅ gacchatu te mano
adhā pitṝn api drava ||

18.65.7

mā te mano māsur
aṅgānāṃ mā ramaś ca te |
mā te hāsta tanvaḥ kiṃ caneha ||

18.65.8

mā vṛkṣaḥ saṃ bādhiṣṭa
mā devī pṛthivī mahī |
lokaṃ pitṛṣu vittvā -
-edhasva yamarājasu ||

18.65.9

yat te aṅgaṃ vinihitaṃ parācair
apānaḥ prāṇo ya u te paretaḥ |
yat te saṃgatya pitaraḥ sanīḍā
ghāse ghāsam ā sādayantu ||

18.65.10

apemaṃ jīvā arudhan gṛhebhyas
taṃ nir ūhata pari grāmād itaḥ |
mṛtyo yamasyāsi dūtaḥ pracetā
asūn pitṛbhyo gamayāṃ cakartha ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0