Paippalāda-Saṃhitā · Chapter 18.64

ajo bhāgas tapasas taṃ tapasva
taṃ te śocis tapatu taṃ te arciḥ |
yās te śivās tanvo jātavedas
tābhir vahainaṃ sukṛtām ulokam ||

yās te śocayo raṃhayo jātavedas
tanvaḥ krūrāḥ parīṅkhayante |
ajaṃ yantam anu tās te sam ṛṇvatām
athetarābhiḥ śivatamābhiḥ śṛtaṃ kṛdhi ||

ava sṛja punar agne pitṛbhyo
yas ta āhutaś carati svadhābhiḥ |
āyur vasāna upa yātu śeṣaḥ
saṃ gacchatāṃ tanvā suvarcāḥ ||

ati drava sārameyau śvānau
caturakṣau śabalau sādhunā pathā |
adhā pitṝn suvidatrām̐ upehi
yamena ye sadhamādaṃ madanti ||

yau te śvānau yama rakṣitārau
caturakṣau pathirakṣī nṛcakṣasā |
tābhyām enaṃ pari dhehi rājan
svasti cāsmā anamīvaṃ ca dhehi ||

urūṇasāv ity ekā ||

soma ekebhyaḥ pavate
ghṛtam eka upāsate |
yebhyo madhu prajāvati
tāṃś cid evāpi gacchatāt ||

ye ca pūrva ṛtasācā
ṛtajātā ṛtāyavaḥ |
pitṝn tapasvato yama
tapojām̐ api gacchatāt ||

tapasā ye anādhṛṣyās
tapasā ye svar yayuḥ |
tapo ye cakrire mahas
tāṃś cid evāpi gacchatāt ||

sahasraṇīthāḥ kavayo
ye gopāyanti sūryam |
ṛṣīn tapasvato yama
tapojām̐ api gacchatāt ||