Paippalāda-Saṃhitā · Chapter 18.66

ye dasyavaḥ pitṛṣu praviṣṭā
jñātimukhā ahutādaś caranti |
parāpuro nipuro ye caranti
tān asmād yajñāt pra dhamantu devāḥ ||

saṃ viśantv iha pitaraḥ svā naḥ
syonaṃ kṛṇvantu pratiranta āyuḥ |
tebhyaḥ śakema haviṣā yakṣamāṇā
jyog jīvantaḥ śaradaḥ purūcīḥ ||

yāṃ te dhenuṃ nigṛṇāmi
yaṃ vā te kṣīra odanam |
tenā janasyāsau bhartā
yo 'trāsad ajīvanaḥ ||

aśvāvatīṃ pra tara yā suśevā
ṛkṣīkāṃ vā prataraṃ navīyaḥ |
yas tvā jaghāna vadhyaḥ so astu
mā so anyad vidata bhāgadheyam ||

yamaḥ parastād avaro vivasvān
tataḥ paro nāti paśyāmy anyat |
yame adhvaro adhi me niviṣṭo
bhuve vivasvān anvātatāna ||

apāgūhann amṛtāṃ martyebhyaḥ
kṛtvī suparṇām adadhur vivasvate |
utāśvināv abharad yat tad āsīd
ajahād u dvā mithunā saraṇyūḥ ||

ye nikhātā ye paroptā
ye dagdhā ye coddhitāḥ |
sarvāṃs tān agna ā vaha
pitṝn haviṣe attave ||

ye ceha pitaro ye ceha na
yāṃś ca vidma yām̐ u ca na pravidma |
tvaṃ vettha yadi te jātavedaḥ
svadhābhir yajñaṃ sukṛtaṃ juṣantām ||

śaṃ tapa māti tapo
agne mā tanvaṃ tapaḥ |
vaneṣu śuṣmo astu te
pṛthivyām astu yad dharaḥ ||

dadāmy asmā avasānam etad
ya eṣa āgan mama ced abhūd iha |
yamaś cikitvān praty etad āha
mamaiṣa rāya upa tiṣṭhatām iha ||