पैप्पलाद-संहिता · अध्याय 18.64

अजो भागस् तपसस् तं तपस्व
तं ते शोचिस् तपतु तं ते अर्चिः ।
यास् ते शिवास् तन्वो जातवेदस्
ताभिर् वहैनं सुकृताम् उलोकम् ॥

यास् ते शोचयो रंहयो जातवेदस्
तन्वः क्रूराः परीङ्खयन्ते ।
अजं यन्तम् अनु तास् ते सम् ऋण्वताम्
अथेतराभिः शिवतमाभिः शृतं कृधि ॥

अव सृज पुनर् अग्ने पितृभ्यो
यस् त आहुतश् चरति स्वधाभिः ।
आयुर् वसान उप यातु शेषः
सं गच्छतां तन्वा सुवर्चाः ॥

अति द्रव सारमेयौ श्वानौ
चतुरक्षौ शबलौ साधुना पथा ।
अधा पितॄन् सुविदत्राँ उपेहि
यमेन ये सधमादं मदन्ति ॥

यौ ते श्वानौ यम रक्षितारौ
चतुरक्षौ पथिरक्षी नृचक्षसा ।
ताभ्याम् एनं परि धेहि राजन्
स्वस्ति चास्मा अनमीवं च धेहि ॥

उरूणसाव् इत्य् एका ॥

सोम एकेभ्यः पवते
घृतम् एक उपासते ।
येभ्यो मधु प्रजावति
तांश् चिद् एवापि गच्छतात् ॥

ये च पूर्व ऋतसाचा
ऋतजाता ऋतायवः ।
पितॄन् तपस्वतो यम
तपोजाँ अपि गच्छतात् ॥

तपसा ये अनाधृष्यास्
तपसा ये स्वर् ययुः ।
तपो ये चक्रिरे महस्
तांश् चिद् एवापि गच्छतात् ॥

सहस्रणीथाः कवयो
ये गोपायन्ति सूर्यम् ।
ऋषीन् तपस्वतो यम
तपोजाँ अपि गच्छतात् ॥