પૈપ્પલાદ-સંહિતા · અધ્યાય 18.64

અજો ભાગસ્ તપસસ્ તં તપસ્વ
તં તે શોચિસ્ તપતુ તં તે અર્ચિઃ ।
યાસ્ તે શિવાસ્ તન્વો જાતવેદસ્
તાભિર્ વહૈનં સુકૃતામ્ ઉલોકમ્ ॥

યાસ્ તે શોચયો રંહયો જાતવેદસ્
તન્વઃ ક્રૂરાઃ પરીઙ્ખયન્તે ।
અજં યન્તમ્ અનુ તાસ્ તે સમ્ ઋણ્વતામ્
અથેતરાભિઃ શિવતમાભિઃ શૃતં કૃધિ ॥

અવ સૃજ પુનર્ અગ્ને પિતૃભ્યો
યસ્ ત આહુતશ્ ચરતિ સ્વધાભિઃ ।
આયુર્ વસાન ઉપ યાતુ શેષઃ
સં ગચ્છતાં તન્વા સુવર્ચાઃ ॥

અતિ દ્રવ સારમેયૌ શ્વાનૌ
ચતુરક્ષૌ શબલૌ સાધુના પથા ।
અધા પિતૄન્ સુવિદત્રાઁ ઉપેહિ
યમેન યે સધમાદં મદન્તિ ॥

યૌ તે શ્વાનૌ યમ રક્ષિતારૌ
ચતુરક્ષૌ પથિરક્ષી નૃચક્ષસા ।
તાભ્યામ્ એનં પરિ ધેહિ રાજન્
સ્વસ્તિ ચાસ્મા અનમીવં ચ ધેહિ ॥

ઉરૂણસાવ્ ઇત્ય્ એકા ॥

સોમ એકેભ્યઃ પવતે
ઘૃતમ્ એક ઉપાસતે ।
યેભ્યો મધુ પ્રજાવતિ
તાંશ્ ચિદ્ એવાપિ ગચ્છતાત્ ॥

યે ચ પૂર્વ ઋતસાચા
ઋતજાતા ઋતાયવઃ ।
પિતૄન્ તપસ્વતો યમ
તપોજાઁ અપિ ગચ્છતાત્ ॥

તપસા યે અનાધૃષ્યાસ્
તપસા યે સ્વર્ યયુઃ ।
તપો યે ચક્રિરે મહસ્
તાંશ્ ચિદ્ એવાપિ ગચ્છતાત્ ॥

સહસ્રણીથાઃ કવયો
યે ગોપાયન્તિ સૂર્યમ્ ।
ઋષીન્ તપસ્વતો યમ
તપોજાઁ અપિ ગચ્છતાત્ ॥