Paippalāda-Saṃhitā · Chapter 18.6

gṛhās tvā prorṇuvantu varcasā bhagena
jyotiṣmad idaṃ prati muñcasva vapuḥ |
uṣā iva sūryasya saṃdṛśi ||

indrāgnī dyāvāpṛthivī ha pūṣā
mitrāvaruṇā bhago aśvinobhā |
bṛhaspatir maruto brahma soma
imāṃ nārīṃ prajayā vardhayantu ||

bṛhaspatiḥ prathamaḥ sūryāyāḥ
śīrṣe keṣām̐ akalpayat |
tenemām aśvinā nārīṃ
patyā saṃ śobhayāmasi ||

idaṃ tad rūpaṃ yad avasta yoṣā
jāyāṃ jijñāse manasā carantīm |
tām anv artiṣye sakhibhir navagvaiḥ
ka imaṃ vidvān vi cacarta pāśam ||

ahaṃ vi ṣyāmi mayi rūpam asyā
vedad it paśyan manasaḥ kulāyam |
na steyam admi manasod amucye
svayaṃ śrathnāno varuṇasya pāśam ||

imaṃ vi ṣyāmi varuṇasya pāśaṃ
yena tvābadhnāt savitā suśevaḥ |
uruṃ lokaṃ sugam atra panthāṃ
kṛṇomi tubhyaṃ sahapatnyai vadhu ||

ud yacchadhvam apa rakṣo hanātha-
-imāṃ nārīṃ sukṛte dadhāta |
dhātā vipaścit patim asyai viveda
bhago rājā pura etu prajānan ||

bhagas tatakṣa caturaḥ pado
bhagas tatakṣa catvāry uṣpalāni |
tvaṣṭā pipeśa madhyato vardhrān
sā no astu sumaṅgalī ||

enājyena haviṣā
prajāyai ca vareṇyam |
paśubhyaś cakṣuṣe ca kaṃ
sam agniṃ sam idhīmahi ||

sukiṃśukaṃ vahatuṃ viśvarūpaṃ
hiraṇyavarṇaṃ suvṛtaṃ sucakram |
ā roha sūrye amṛtasya lokaṃ
syonaṃ patibhyo vahatuṃ kṛṇu tvam ||

mā hiṃsiṣṭāṃ kumāryaṃ
sthūne devakṛte pathi |
śālāyā devyā dvāraṃ
syonaṃ kṛṇmo vadhūpatham ||

brahmāparaṃ yujyatāṃ brahma pūrvaṃ
brahmāntato madhyato brahma sarvataḥ |
anāvyādhāṃ devapurāṃ prapadya
śivā syonā patiloke vi rāja ||