Paippalāda-Saṃhitā · Chapter 18.7

tubhyam agre pary avahan
sūryāṃ vahatunā saha |
punaḥ patibhyo jāyāṃ dā
agne prajayā saha ||

punaḥ patnīm agnir adād
āyuṣā saha varcasā |
dīrghāyur asyā yaḥ patir
jīvāti śaradaḥ śatam ||

somasya jāyā prathamaṃ
gandharvas te 'paraḥ patiḥ |
tṛtīyo agniṣ ṭe patis
turīyas te manuṣyajāḥ ||

somo dadad gandharvāya
gandharvo dadad agnaye |
rayiṃ ca putrāṃś cādād
agnir mahyam atho imām ||

ā vām agan sumatir vājinīvasū
ny aśvinā hṛtsu kāmā araṃsata |
abhūtaṃ gopā mithunā śubhaspatī
priyā aryamṇo duryām̐ aśīmahi ||

sā mandasānā manasā śivena
rayiṃ dhehi sarvavīraṃ vacasyam |
sugaṃ tīrthaṃ suprapāṇaṃ śubhaspatī
sthāṇuṃ pathiṣṭhām apa durmatiṃ hatam ||

apa rakṣāṃsy apa durmatiṃ hataṃ
śubhaspatī vahator yāto asmāt |
purogavo jayan rakṣāṃsy agne
kṣetravit pūrvo vi mṛdho nudasva ||

yā oṣadhayo yā nadyo
yāni kṣetrāṇi yā vanā |
te tvā vadhu prajāvatīṃ
patye rakṣantu rakṣasaḥ ||

emaṃ panthām aganma
sugaṃ svastivāhanam |
yatra vīro na riṣyaty
anyeṣāṃ vindate vasu ||

idaṃ su me naraḥ śṛṇuta
yayāśiṣā dampatī vāmam aśnutaḥ |
ye gandharvā apsarasaś ca devīr
eṣu vānaspatyeṣv adyādhi tasthuḥ |
syonās te asyai vadhvai bhavantu
mā hiṃsiṣur vahatum uhyamānam ||