Paippalāda-Saṃhitā · Chapter 18.5

samrājñy edhi śvaśureṣu
samrājñy uta śvaśruvām |
nanānduḥ samrājñy edhi
samrājñy uta devṛṣu ||

yā akṛntann avayan yāś ca tatnire
yā devīr antām̐ abhito 'dadanta |
tās tvā jarase saṃ vyayantv
āyuṣmatīdaṃ pari dhatsva vāsaḥ ||

jīvaṃ rudanti vi nayanty adhvaraṃ
dīrghām anu prasitiṃ dīdhiyur naraḥ |
vāmaṃ pitṛbhyo ya idaṃ samīrire
mayaḥ patibhyo janaye pariṣvaje ||

dhruvaṃ syonaṃ prajāyai te dhārayāmy
aśmānaṃ devyāḥ pṛthivyā upasthe |
tam ā rohānumādyā suvīrā
dīrghaṃ ta āyuḥ savitā kṛṇotu ||

devas te savitā hastaṃ gṛhṇātu
somo rājā suprajasaṃ kṛṇotu |
agniḥ subhagāṃ jātavedāḥ
patyā patnīṃ jaradaṣṭiṃ kṛṇotu ||

gṛhṇāmi te saubhagatvāya hastaṃ
mayā patyā jaradaṣṭir yathāsaḥ |
bhago aryamā savitā purandhir
mahyaṃ tvādur gārhapatyāya devāḥ ||

yenāgnir asyā bhūmyā
hastaṃ jagrāha dakṣiṇam |
tena gṛhṇāmi te hastaṃ
mā vyathiṣṭhā mayā saha ||

dhātā te hastam agrahīt
savitā hastam agrahīt |
bhagas te hastam agrahīd
aryamā hastam agrahīt |
patnī tvam asi dharmaṇā-
-ahaṃ gṛhapatis tava ||

mameyam astu poṣyā
mahyaṃ tvādād bṛhaspatiḥ |
mayā patyā prajāvatī
saṃ jīva śaradaḥ śatam ||

tvaṣṭā vāso vy adadhāc chubhe kaṃ
bṛhaspateḥ praśiṣā kavīnām |
tenemāṃ nārīṃ savitā bhagaś ca
sūryām iva pari dhattāṃ prajāyai ||