પૈપ્પલાદ-સંહિતા · અધ્યાય 18.6

ગૃહાસ્ ત્વા પ્રોર્ણુવન્તુ વર્ચસા ભગેન
જ્યોતિષ્મદ્ ઇદં પ્રતિ મુઞ્ચસ્વ વપુઃ ।
ઉષા ઇવ સૂર્યસ્ય સંદૃશિ ॥

ઇન્દ્રાગ્ની દ્યાવાપૃથિવી હ પૂષા
મિત્રાવરુણા ભગો અશ્વિનોભા ।
બૃહસ્પતિર્ મરુતો બ્રહ્મ સોમ
ઇમાં નારીં પ્રજયા વર્ધયન્તુ ॥

બૃહસ્પતિઃ પ્રથમઃ સૂર્યાયાઃ
શીર્ષે કેષાઁ અકલ્પયત્ ।
તેનેમામ્ અશ્વિના નારીં
પત્યા સં શોભયામસિ ॥

ઇદં તદ્ રૂપં યદ્ અવસ્ત યોષા
જાયાં જિજ્ઞાસે મનસા ચરન્તીમ્ ।
તામ્ અન્વ્ અર્તિષ્યે સખિભિર્ નવગ્વૈઃ
ક ઇમં વિદ્વાન્ વિ ચચર્ત પાશમ્ ॥

અહં વિ ષ્યામિ મયિ રૂપમ્ અસ્યા
વેદદ્ ઇત્ પશ્યન્ મનસઃ કુલાયમ્ ।
ન સ્તેયમ્ અદ્મિ મનસોદ્ અમુચ્યે
સ્વયં શ્રથ્નાનો વરુણસ્ય પાશમ્ ॥

ઇમં વિ ષ્યામિ વરુણસ્ય પાશં
યેન ત્વાબધ્નાત્ સવિતા સુશેવઃ ।
ઉરું લોકં સુગમ્ અત્ર પન્થાં
કૃણોમિ તુભ્યં સહપત્ન્યૈ વધુ ॥

ઉદ્ યચ્છધ્વમ્ અપ રક્ષો હનાથ-
-ઇમાં નારીં સુકૃતે દધાત ।
ધાતા વિપશ્ચિત્ પતિમ્ અસ્યૈ વિવેદ
ભગો રાજા પુર એતુ પ્રજાનન્ ॥

ભગસ્ તતક્ષ ચતુરઃ પદો
ભગસ્ તતક્ષ ચત્વાર્ય્ ઉષ્પલાનિ ।
ત્વષ્ટા પિપેશ મધ્યતો વર્ધ્રાન્
સા નો અસ્તુ સુમઙ્ગલી ॥

એનાજ્યેન હવિષા
પ્રજાયૈ ચ વરેણ્યમ્ ।
પશુભ્યશ્ ચક્ષુષે ચ કં
સમ્ અગ્નિં સમ્ ઇધીમહિ ॥

સુકિંશુકં વહતું વિશ્વરૂપં
હિરણ્યવર્ણં સુવૃતં સુચક્રમ્ ।
આ રોહ સૂર્યે અમૃતસ્ય લોકં
સ્યોનં પતિભ્યો વહતું કૃણુ ત્વમ્ ॥

મા હિંસિષ્ટાં કુમાર્યં
સ્થૂને દેવકૃતે પથિ ।
શાલાયા દેવ્યા દ્વારં
સ્યોનં કૃણ્મો વધૂપથમ્ ॥

બ્રહ્માપરં યુજ્યતાં બ્રહ્મ પૂર્વં
બ્રહ્માન્તતો મધ્યતો બ્રહ્મ સર્વતઃ ।
અનાવ્યાધાં દેવપુરાં પ્રપદ્ય
શિવા સ્યોના પતિલોકે વિ રાજ ॥