Paippalāda-Saṃhitā · Chapter 18.25

bibharty aṃśuṃ prati muñcate srajam
ud ūhate raśmīn aṃśuṃ bṛhantam |
divākaraḥ paśyati yat parāt paraṃ
prāhṇā pra varṣmaṇā viśvam aprāṅ
hiraṇyayo haritaḥ ketur udyan ||

ārohañ chukro bṛhatīr atandro
martyaḥ kṛṇute vīryāṇi |
divyaḥ suparṇo mahiṣo vātaraṃhā
yat sarvān lokām̐ abhi yad vibhāti ||

abhy anyad eti pary anyad vasāno
'horātrābhyāṃ mahiṣaḥ kalpamānaḥ |
sūryaṃ vayaṃ rajasi kṣiyantaṃ
gātuvidaṃ havāmahe nāthakāmāḥ ||

pṛthivīpro mahiṣo nādhamānasya
gātur adabdhacakṣuḥ pari sarvaṃ babhūva |
viśvaṃ saṃpaśyan suvidatro yajatraḥ
śivayā nas tanvā śarma yacchāt ||

pary asya mahimā pṛthivīṃ samudraṃ
jyotiṣā vibhrājan pari dyām antarikṣam |
ahorātrābhyāṃ saha saṃvidāna
upā na āyuḥ pra tirād ariṣṭam ||

abodhy agniḥ samidhā janānāṃ
prati dhenum ivāyatīm uṣāsam |
yahvā iva pra vayām ujjihānāḥ
pra bhānavaḥ sisrate nākam accha ||

kumāraṃ mātā yuvatir garbham antar
guhā bibharti na dadāti pitre |
anīkam asya na minaj janāsaḥ
puraḥ paśyanti nihitam aratau ||

tam etaṃ tvaṃ yuvate kumāraṃ
tveṣī bibharṣi mahiṣī jajāna |
urvīr hi garbhaḥ śarado vavardha-
-apaśyaṃ jātaṃ yam asūta mātā ||

yasya tisro vartana ekadhā sato
yasmai baliṃ devajanā haranti |
tasyāsau dyauḥ pṛthivy antarikṣaṃ
guhā tiṣṭhanti vasunā samaktāḥ ||

nava divo devajanena guptā
navāntarikṣāṇi nava bhūmaya imāḥ |
yasminn idaṃ sarvam otaṃ protaṃ
yasmād anyan na paraṃ kiṃ canāsti ||