Paippalāda-Saṃhitā · Chapter 18.24

citraṃ devānāṃ ketur anīkaṃ
jyotiṣmān pradiśaḥ sūrya udyan |
divākaro ati dyumnais tamāṃsi
viśvātārīd duritāni śukraḥ ||

citraṃ devānām ud agād anīkaṃ
cakṣur mitrasya varuṇasyāgneḥ |
āprā dyāvāpṛthivī antarikṣaṃ
sūrya ātmā jagatas tasthuṣaś ca ||

uccā patantam aruṇaṃ suparṇaṃ
madhye divas taraṇiṃ bhrājamāṇam |
paśyema tvā savitāraṃ yam āhur
ajasraṃ jyotir yad avindad atriḥ ||

divas pṛṣṭhe dhāvamānaṃ suparṇam
adityāḥ putraṃ nāthakāma upa yāmi bhītaḥ |
sa naḥ sūrya pra tira dīrgham āyur
mā riṣāma sumatau te syāma ||

ahorātrāṇi vidadhat
kṛṇvāṇaḥ pārthivaṃ rajaḥ |
navaṃnavaṃ sakhībhavaṃ
kṛṇuṣe deva sūrya ||

sahasrāhṇyaṃ viyatāv asya pakṣau
harer haṃsasya pacataḥ svargam |
sa viśvān devān urasy upadadya
saṃpaśyan yāti bhuvanāni viśvā ||

rohito loko abhavad
rohito 'gre prajāpatiḥ |
rohito yajñānāṃ mukhaṃ
rohito jyotir ucyate ||

rohito bhūto abhavad
rohito bhavyam ābharat |
rohito yajñānāṃ mukhaṃ
rohitaḥ svar ā bharat ||

rohitaḥ kālo abhavad
rohito 'ty atapad divam |
rohito raśmibhir bhūmiṃ
samudram anu saṃ carāt ||

sarvā diśaḥ saṃ carati
rohito adhipatir divaḥ |
divaṃ samudram ād bhūmiṃ
sarvān lokān vi rakṣatu ||