Paippalāda-Saṃhitā · Chapter 18.11
yaṃ no dadur brahmabhāgaṃ vadhūyor
vāso vadhvaś ca vastram |
yuvaṃ brahmaṇe 'numanyamānau
bṛhaspate sākam indraś ca dattam ||
devair dattaṃ vanunā sākam etad
vādhūyaṃ vadhvo vāso asyāḥ |
yo brahmaṇe cikituṣe dadāti
sa id rakṣāṃsi talpyāni hanti ||
syonād yoner adhi budhyamānau
hasāmudau mahasā modamānau |
sugū suputrau sugṛhau tarātho
jīvā uṣaso vibhātīḥ ||
navaṃ vasānaḥ surabhiḥ suvāsā
udāgāṃ jīva uṣaso vibhātīḥ |
āṇḍāt patatrīvāmukṣi
viśvasmād enasas pari ||
śumbhanī dyāvāpṛthivī
antisumne mahivrate |
āpaḥ sapta sravantīs
tā no muñcantv aṃhasaḥ ||
sūryāyai devebhyo
mitrāya varuṇāya ca |
ye bhūtasya pracetasas
tebhyo 'ham akaraṃ namaḥ ||
ya ṛte cid abhiśriṣaḥ
purā jatrubhya ātṛdaḥ |
saṃdhātā saṃdhiṃ maghavā
purūvasur niṣkartā vihṛtaṃ punaḥ ||
apāsmat tama ucchatu
nīlaṃ piśaṅgam uta lohitaṃ yat |
nirdahanīṃ pṛṣātakīm
asmin tāṃ sthāṇāv adhy ā sṛjāmi ||
yāvatīḥ kṛtyā upavāsane
yāvanto rājño varuṇasya pāśāḥ |
vyṛddhayo yā asamṛddhayaś ca-
-asmin tā sthāṇau prati muñcāmi sarvāḥ ||
ye antā yāvatīḥ sica
otavo ye ca tantavaḥ |
vāso yat patnībhir utaṃ
tan mā syonam upa spṛṣāt ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0