Paippalāda-Saṃhitā · Chapter 17.9

yasmād ṛco apātakṣaṃ
yajur yasmād apākaṣan |
chandāṃsi yasya lomāni
skambhaṃ taṃ brūhi katamaḥ svid eva saḥ ||

asacchākhāṃ pratiṣṭhantīṃ
paramam iva janā viduḥ |
uto san manyante 'vare
ye 'sya śākhām upāsate

yatrādityāś ca rudrāś ca
vasavaś ca samāhitāḥ |
skambhaṃ taṃ brūhi katamaḥ svid eva saḥ ||

yasya trayastriṃśad devā
nidhiṃ rakṣanti sarvadā |
nidhiṃ tam adya ko veda
yaṃ devā abhirakṣata ||

yatra devā brahmavido
brahma jyeṣṭham upāsate |
yo vai ta brāhmaṇo veda
taṃ vai brahmavido viduḥ ||

bṛhanto nāma te devā
asatas pari jajñire |
ekaṃ tad aṅgaṃ skambhasya-
-asad āhuḥ paro janāḥ ||

yatra skambhaḥ prajanayan
purāṇaṃ vyavartayat |
ekaṃ tad aṅgaṃ skambhasya
purāṇam anu saṃ viduḥ ||

yatra trayastriṃśad devā
aṅgā gātrāṇi bhejire |
tān vai trayastriṃśad devān
eke brahmavido viduḥ ||

hiraṇyagarbhaṃ paramam
anatyudyaṃ janā viduḥ |
skambhas tad agre prāsiñcad
dhiraṇyaṃ loke antarā ||

skambhe lokāḥ skambhe tapaḥ
skambhe 'dhy ṛtam āhitam |
skambhaṃ tvā vidma pratyakṣam
indre sarvaṃ samāhitam ||