Paippalāda-Saṃhitā · Chapter 17.10
indre lokā indre tapa
indre 'dhy ṛtam āhitam |
indraṃ tvā vidma pratyakṣaṃ
skambhe sarvaṃ samāhitam ||
nāma nāmnā johavīmi
purā sūryāt puroṣasaḥ |
yad adaḥ prathamaṃ saṃbabhūva
saha tat svarājyaṃ jagāma
yasmān na param asti bhūtam ||
yasya bhūmiḥ pramāntarikṣam utodaram |
divaṃ yaś cakre mūrdhānaṃ
tasmai jyeṣṭhāya brahmaṇe namaḥ ||
yasya sūryaś cakṣuś
candramāś ca punar navaḥ |
agniṃ yaś cakra āsyaṃ
tasmai jyeṣṭhāya brahmaṇe namaḥ ||
yasya vātaḥ prāṇāpānau
cakṣur aṅgiraso 'bhuvan |
diśo yaś cakre prajñānīs
tasmai jyeṣṭhāya brahmaṇe namaḥ ||
yaḥ śramāt tapaso jāto
lokān sarvān samānaśe |
somaṃ yaś cakre kevalaṃ
tasmai jyeṣṭhāya brahmaṇe namaḥ ||
skambho dādhāra pṛthivīṃ dyām utāmūṃ
skambho dādhārorv antarikṣam |
skambho dādhāra pradiśaḥ ṣaḍ urvīḥ
skambha idaṃ viśvaṃ bhuvanam ā viveśa ||
kathaṃ vāto nelayati
kathaṃ na ramate manaḥ |
kim āpaḥ satyaṃ prepsantīḥ
pra caṅkramīti sarvadā ||
mahad yakṣaṃ bhuvanasya madhye
tapasi krāntaṃ salilasya pṛṣṭhe |
tasmiṃ chrayante ya u ke ca devā
vṛkṣasya skambhaṃ parita iva śākhāḥ ||
yasmai hastābhyāṃ pādābhyāṃ
vācā śrotreṇa cakṣuṣā |
yasmai devā sadā baliṃ
prayacchanti vimite 'mitaṃ
skambhaṃ taṃ brūhi katamaḥ svid eva saḥ ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0