Paippalāda-Saṃhitā · Chapter 17.8
yatra lokāś ca kośāś ca
brahma yatra janā viduḥ |
asac ca yatra sac cāntaḥ
skambhaṃ taṃ brūhi katamaḥ svid eva saḥ ||
yatra tapaḥ parākramya
ṛtaṃ dhārayaty uttaram |
vrataṃ ca yatra śraddhā ca
brahmāpaḥ samāhitāḥ
skambhaṃ (…) ||
yasmin bhūmir antarikṣaṃ
dyaur asminn adhyāhitā |
yatrāgniś candramā sūryo
vātas tiṣṭhanty ārpitāḥ
skambhaṃ (…) ||
yasya trayastriṃśad devā
aṅge sarve samāhitāḥ |
skambhaṃ (…) ||
yatra ṛṣayo bhūtakṛta
ṛcaḥ sāma yajur mahī |
ekarṣir yasminn ārpitāḥ
skambhaṃ (…) ||
yasya catasraḥ pradiśo
nāḍyas tiṣṭhanti prapyasāḥ |
yajño yasmin parākrāntaḥ
skambhaṃ (…) ||
yatrāmṛtaṃ ca mṛtyuś ca
puruṣaś ca samāhitāḥ |
samudro yasya nāḍyaḥ
skambhaṃ taṃ brūhi katamaḥ svid eva saḥ ||
ye puruṣe brahma vidus
te skambham anu saṃ viduḥ |
yo veda parameṣṭhinaṃ
yaś ca veda prajāpatim |
jyeṣṭhaṃ ye brāhmaṇaṃ vidus
te skambham anu saṃ viduḥ ||
yasya śiro vaiśvānaraś
cakṣur aṅgiraso 'bhavan |
aṅgāni yasya yātavaḥ
skambhaṃ taṃ brūhi katamaḥ svid eva saḥ ||
yasya brahma mukham āhur
jihvāṃ madhukaśām uta |
virājaṃ yasyodha āhuḥ
skambhaṃ (…) ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0