Scripture Library

Paippalāda-Saṃhitā · Chapter 17.7

17.7.1

kasminn aṅge tapo asyādhi tiṣṭhati
kasminn aṅga ṛtam asyādhyāhitam |
kva vrataṃ kva śraddhāsya tiṣṭhati
kasminn aṅge satyam asya pratiṣṭhitam ||

17.7.2

kva brahma kva tiṣṭhanty āpaḥ
kasminn aṅge diśo asya pratiṣṭhitāḥ |
katamad aṅgam anu saṃ carete
ahorātre saṃvidāne samānam ||

17.7.3

kasminn aṅge tiṣṭhati bhūmir asya
kasminn aṅge tiṣṭhaty antarikṣam |
kasminn aṅge tiṣṭhaty āhitā dyauḥ
kasminn aṅge tiṣṭhaty uttaraṃ divaḥ ||

17.7.4

kasmād aṅgād dīpyate agnir asya
kasmād aṅgāt pavate mātariśvā |
kasmād aṅgād vi mimīte 'dhi candramāḥ
skambhasya mahad vimimāno aṅgam ||

17.7.5

kva prepsan dīpyata ūrdhvo agniḥ
kva prepsan pavate mātariśvā |
yatra prepsantīr abhiyanty āvṛtaḥ
skambhaṃ taṃ brūhi katamaḥ svid eva saḥ ||

17.7.6

kva prepsantī yuvatī virūpe
ahorātre dravataḥ saṃvidāne |
yatra prepsantīr abhiyanty āpaḥ
skambhaṃ (…) ||

17.7.7

kvārdhamāsāḥ kva yanti māsāḥ
saṃvatsareṇa saha saṃvidānāḥ |
yatra yanty ṛtavo yatrārtavāḥ
skambhaṃ (…) ||

17.7.8

yasmin skandhā prajāpatir
lokān sarvām̐ adhārayat |
skambhaṃ taṃ brūhi katamaḥ svid eva saḥ ||

17.7.9

yat paramam avamaṃ yac ca madhyamaṃ
prajāpatiḥ sasṛje viśvarūpam |
kiyatā skambhaḥ pra viveśa tatra
yan na pārviśat kva tad babhūva ||

17.7.10

kiyatā skambhaḥ pra viveśa bhūtaṃ
kiyad bhaviṣyad anvāśaye 'sya |
ekaṃ yad aṅgam akṛṇot sahasradhā
kiyatā skambhaḥ pra viveśa tatra ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0