પૈપ્પલાદ-સંહિતા · અધ્યાય 17.8

યત્ર લોકાશ્ ચ કોશાશ્ ચ
બ્રહ્મ યત્ર જના વિદુઃ ।
અસચ્ ચ યત્ર સચ્ ચાન્તઃ
સ્કમ્ભં તં બ્રૂહિ કતમઃ સ્વિદ્ એવ સઃ ॥

યત્ર તપઃ પરાક્રમ્ય
ઋતં ધારયત્ય્ ઉત્તરમ્ ।
વ્રતં ચ યત્ર શ્રદ્ધા ચ
બ્રહ્માપઃ સમાહિતાઃ
સ્કમ્ભં (…) ॥

યસ્મિન્ ભૂમિર્ અન્તરિક્ષં
દ્યૌર્ અસ્મિન્ન્ અધ્યાહિતા ।
યત્રાગ્નિશ્ ચન્દ્રમા સૂર્યો
વાતસ્ તિષ્ઠન્ત્ય્ આર્પિતાઃ
સ્કમ્ભં (…) ॥

યસ્ય ત્રયસ્ત્રિંશદ્ દેવા
અઙ્ગે સર્વે સમાહિતાઃ ।
સ્કમ્ભં (…) ॥

યત્ર ઋષયો ભૂતકૃત
ઋચઃ સામ યજુર્ મહી ।
એકર્ષિર્ યસ્મિન્ન્ આર્પિતાઃ
સ્કમ્ભં (…) ॥

યસ્ય ચતસ્રઃ પ્રદિશો
નાડ્યસ્ તિષ્ઠન્તિ પ્રપ્યસાઃ ।
યજ્ઞો યસ્મિન્ પરાક્રાન્તઃ
સ્કમ્ભં (…) ॥

યત્રામૃતં ચ મૃત્યુશ્ ચ
પુરુષશ્ ચ સમાહિતાઃ ।
સમુદ્રો યસ્ય નાડ્યઃ
સ્કમ્ભં તં બ્રૂહિ કતમઃ સ્વિદ્ એવ સઃ ॥

યે પુરુષે બ્રહ્મ વિદુસ્
તે સ્કમ્ભમ્ અનુ સં વિદુઃ ।
યો વેદ પરમેષ્ઠિનં
યશ્ ચ વેદ પ્રજાપતિમ્ ।
જ્યેષ્ઠં યે બ્રાહ્મણં વિદુસ્
તે સ્કમ્ભમ્ અનુ સં વિદુઃ ॥

યસ્ય શિરો વૈશ્વાનરશ્
ચક્ષુર્ અઙ્ગિરસો ઽભવન્ ।
અઙ્ગાનિ યસ્ય યાતવઃ
સ્કમ્ભં તં બ્રૂહિ કતમઃ સ્વિદ્ એવ સઃ ॥

યસ્ય બ્રહ્મ મુખમ્ આહુર્
જિહ્વાં મધુકશામ્ ઉત ।
વિરાજં યસ્યોધ આહુઃ
સ્કમ્ભં (…) ॥