પૈપ્પલાદ-સંહિતા · અધ્યાય 17.52

પૃથગ્ રૂપાણિ બહુધા પશૂનામ્
એકરૂપો ભવતિ સં સમૃદ્ધ્યામ્ ।
એતાં ત્વચં લોહિનીં તાં નુદેથાં
ગ્રાવા શુન્ધાતિ મલગ ઇવ વસ્ત્રા ॥

જનિત્રીવ પ્રતિ હૃણ્યાસિ સૂનું
સં ત્વા દધામિ પૃથિવીં પૃથિવ્યા ।
ઉખાઃ કુમ્ભીર્ વેદ્યાં સંચરન્તાં
યજ્ઞાયુધૈર્ આજ્યેનાભિષિક્તાઃ ॥

ભૂમ્યાં ત્વા ભૂમિમ્ અધિ ધારયામિ
તનૂઃ સમાની વિકૃતા ત એષા ।
યદ્યદ્ યુક્તં લિખિતમ્ અર્પણં ચ
તેન મા સુસ્રોર્ અપિ તદ્ વપામિ ॥

અગ્નિઃ પચન્ રક્ષતુ ત્વા પુરસ્તાદ્
ઇન્દ્રો રક્ષાદ્ દક્ષિણતો મહિત્વા ।
સોમસ્ ત્વા દૃંહાદ્ ધરુણે પ્રતીચ્યા
ઉત્તરાત્ ત્વા વરુણઃ સં દદાતૈ ॥

આ યન્તુ દિવઃ પૃથિવીં સચન્તે
ભૂમ્યાઃ સચન્તે ઉર્વ્ અન્તરિક્ષમ્ ।
શુદ્ધાઃ સતીસ્ તા ઉ શુન્ધન્ત એવ
તા નઃ સ્વર્ગમ્ અભિ લોકં નયન્તુ ॥

પૂતાઃ પવિત્રૈઃ પવન્તે અભ્રાદ્
દિવં ચ યન્તિ પૃથિવીં ચ લોકાન્ ।
તા જીવલા જીવધન્યાઃ પ્રતિષ્ઠાઃ
પાત્ર આસિક્તાઃ પર્ય્ અગ્નિર્ એન્ધામ્ ॥

ઉતેવ પ્રભ્વીર્ ઉત સંમિતાસ
ઉત શુક્રાઃ શુચયશ્ ચામૃતાસઃ ।
તા ઓદનં દમ્પતિભ્યાં પ્રતિષ્ઠા
આપઃ શિક્ષન્તીઃ પ્રવતા સુનાથાઃ ॥

ઉદ્ યોધયન્ત્ય્ અભિ વલ્ગન્તી તપ્તાઃ
ફેનમ્ અસ્યન્તિ બહુલં ચ બિન્દુમ્ ।
યોષેવ દૃષ્ટ્વા પતિમ્ ઋત્વિયા યા-
-એતૈસ્ તણ્ડુલૈર્ ભવતા સમ્ આપઃ ॥

સંખ્યાતા સ્તોકાઃ પૃથિવીં સચન્તે
પ્રાણાપાનૈઃ સંમિતા ઓષધીભિઃ ।
અસંખ્યાતા ઓપ્યમાનાઃ સુવર્ણાઃ
સર્વં સમાપં શુચયઃ શુચિત્વમ્ ॥

ઉત્થાપય સીદતો બુધ્ન એનાન્
અદ્ભિર્ આત્માનમ્ અપિ સં સૃજન્તામ્ ।
અમાસિ પાત્ર ઉદકં યદ્ એતન્
મિતાસ્ તણ્ડુલાઃ પ્રદિશો યતીમાઃ ॥