Paippalāda-Saṃhitā · Chapter 17.49
ye 'śraddhayā dhanakāmyāt
kravyādā samāsate |
te vā anyeṣāṃ kumbhīṃ
pary ādadhati sarvadā ||
iṣīkāṃ caratīṃ vittvā
tilpiyaṃ daṇḍanaṃ naḍam |
tān indra idhmaṃ kṛtvā
yamasyāgniṃ nirādadhau ||
aviḥ kṛṣṇā bhāgadheyaṃ paśūnāṃ
sīsaṃ kravyād uta candraṃ ta āhuḥ |
māṣāḥ piṣṭā bhāgadheyaṃ havyaṃ te
'raṇyānyā gahvaraṃ sacasva ||
pratyañcam arkaṃ pratyarpayitvā
pravidvān panthāṃ vi hy ācakāra |
parāmīṣām asūn dideśa
dīrgheṇāyuṣā sam adhād ihemān ||
anaḍvāhaṃ plavam anv ārabhadhvaṃ
sa vo nirvakṣad duritād avadyāt |
ā rohata savitur nāvaṃ hiraṇyayīṃ
ṣaḍbhir ūrmibhir amatiṃ carema ||
gobhiṣ ṭaremāmatiṃ durevāṃ
yavena kṣudhaṃ puruhūta viśvām |
vayaṃ rājānaḥ prathamā dhanānām
ariṣṭāsa ṛjanībhis tarema ||
pūrṇaṃ nāri pra harābhi kumbham
apāṃ rasair oṣadhīnāṃ ghṛtasya |
imān pātṝṃr amṛtenā sam aṅdhi
sthirā vīrāḥ saṃmanaso bhavantu ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0