Paippalāda-Saṃhitā · Chapter 17.13

yā dhānyāt saṃbhavanti
kṣetrād uptād varpitāta |
kṛtād abhiprahāyyā
naśyatetaḥ sadānvāḥ ||

yāḥ puruṣāḥ pāpagandhāḥ
sadā rukṣā visṛkpadī |
tā vajreṇa samarpayan
nirajetaḥ śacīpate ||

ut tiṣṭhata nir dravata
na va ihāsti nyañcanam |
indro vaḥ sarvāsāṃ sākaṃ
garbhān āṇḍāni bhetsyati ||

indra jahi sthūlaśaṃkhāṃ
mṛṇīhi durṇaśīṃ kuham |
arāyīṃ śakadhūmyaṃ
nāśayāmaḥ sadānvāḥ ||

kim āsutāṃ nagnahvam
ajamāyuṃ ca nighnatīm |
viṭiṭiṅgāḥ pratodinīr
nāśayāmaḥ sadānvāḥ ||

yasyāsutaṃ randhayadhve
yūyaṃ bhaṇvāḥ sadānvāḥ |
tṛṣṭaṃ kṛṇutāṇḍaraṃ
yadā rasena tṛpyata-
-āt surām ava mehatha ||

tasyāḥ pītvāvamakty
atho śīrṣakty ā śaye |
tā ekānnadūṣaṇīr
nāśayāmaḥ sadānvāḥ ||

apārogāñ chakadhūmān
vṛkṣāṇāṃ yantu satvaram |
atho durhārdaso gṛhaṃ
pra mṛśantv arāyyaḥ ||

tāsām ekācchavakā
śaṅkāvaṅkā vanekṛkur
hasanaikā kanikradā |
sarvāsāṃ bhaṇvā vaḥ sākaṃ
nāmadheyāni vidmasi |
yati jātāni vas tati
naśyatetaḥ sadānvāḥ ||

sahasvatīṃ pra harāmi-
imāṃ śālāṃ viṣāsahim |
sadānvāghnīm oṣadhiṃ
jaitrāyācchā vadāmasi ||