પૈપ્પલાદ-સંહિતા · અધ્યાય 17.10

ઇન્દ્રે લોકા ઇન્દ્રે તપ
ઇન્દ્રે ઽધ્ય્ ઋતમ્ આહિતમ્ ।
ઇન્દ્રં ત્વા વિદ્મ પ્રત્યક્ષં
સ્કમ્ભે સર્વં સમાહિતમ્ ॥

નામ નામ્ના જોહવીમિ
પુરા સૂર્યાત્ પુરોષસઃ ।
યદ્ અદઃ પ્રથમં સંબભૂવ
સહ તત્ સ્વરાજ્યં જગામ
યસ્માન્ ન પરમ્ અસ્તિ ભૂતમ્ ॥

યસ્ય ભૂમિઃ પ્રમાન્તરિક્ષમ્ ઉતોદરમ્ ।
દિવં યશ્ ચક્રે મૂર્ધાનં
તસ્મૈ જ્યેષ્ઠાય બ્રહ્મણે નમઃ ॥

યસ્ય સૂર્યશ્ ચક્ષુશ્
ચન્દ્રમાશ્ ચ પુનર્ નવઃ ।
અગ્નિં યશ્ ચક્ર આસ્યં
તસ્મૈ જ્યેષ્ઠાય બ્રહ્મણે નમઃ ॥

યસ્ય વાતઃ પ્રાણાપાનૌ
ચક્ષુર્ અઙ્ગિરસો ઽભુવન્ ।
દિશો યશ્ ચક્રે પ્રજ્ઞાનીસ્
તસ્મૈ જ્યેષ્ઠાય બ્રહ્મણે નમઃ ॥

યઃ શ્રમાત્ તપસો જાતો
લોકાન્ સર્વાન્ સમાનશે ।
સોમં યશ્ ચક્રે કેવલં
તસ્મૈ જ્યેષ્ઠાય બ્રહ્મણે નમઃ ॥

સ્કમ્ભો દાધાર પૃથિવીં દ્યામ્ ઉતામૂં
સ્કમ્ભો દાધારોર્વ્ અન્તરિક્ષમ્ ।
સ્કમ્ભો દાધાર પ્રદિશઃ ષડ્ ઉર્વીઃ
સ્કમ્ભ ઇદં વિશ્વં ભુવનમ્ આ વિવેશ ॥

કથં વાતો નેલયતિ
કથં ન રમતે મનઃ ।
કિમ્ આપઃ સત્યં પ્રેપ્સન્તીઃ
પ્ર ચઙ્ક્રમીતિ સર્વદા ॥

મહદ્ યક્ષં ભુવનસ્ય મધ્યે
તપસિ ક્રાન્તં સલિલસ્ય પૃષ્ઠે ।
તસ્મિં છ્રયન્તે ય ઉ કે ચ દેવા
વૃક્ષસ્ય સ્કમ્ભં પરિત ઇવ શાખાઃ ॥

યસ્મૈ હસ્તાભ્યાં પાદાભ્યાં
વાચા શ્રોત્રેણ ચક્ષુષા ।
યસ્મૈ દેવા સદા બલિં
પ્રયચ્છન્તિ વિમિતે ઽમિતં
સ્કમ્ભં તં બ્રૂહિ કતમઃ સ્વિદ્ એવ સઃ ॥