Paippalāda-Saṃhitā · Chapter 16.97

ā nayaitam ā rabhasva sukṛtāṃ
lokam api gacchatu prajānan |
tīrtvā tamāṃsi bahudhā vipaśyann
ajo nākam ā kramatāṃ tṛtīyam ||

pra pado nenigdhi duścaritaṃ yac cacāra
śuddhaiḥ śaphair ā kramatāṃ prajānan |
jyotiṣmantaṃ sukṛtāṃ lokam īpsan
tṛtīye nāke adhi vi kramasva ||

anu chya śyāmena tvacam etāṃ viśastar
yathāparv asinā māti maṃsthāḥ |
mābhi druhaḥ paruśaḥ kalpayainaṃ
sukṛtāṃ madhye adhi vi śrayemam ||

bhūmyāṃ tvā bhūmim adhi dhehy etām
ā siñcodakam ava dhehy enam |
pary ādhattāgninā śamitāraḥ
śṛto gacchatu sukṛtāṃ yatra lokaḥ ||

ut krāmātaḥ pari ced ataptas
taptāc caror adhi nākaṃ tṛtīyam |
agner agnir adhi saṃ babhūvitha
jyotiṣmān gaccha sukṛtāṃ yatra lokaḥ ||

pañcaudanaḥ pañcadhā vi kramasva-
-ākraṃsyamānaḥ pañca jyotīm̐ṣi |
ījānānāṃ sukṛtāṃ prehi madhyaṃ
jyotiṣmantam abhi lokaṃ jayāsmai ||

ajam evāgnim ajam ij jyotir āhur
ajaṃ brahmaṇe jīyatā deyam āhuḥ |
ajas tamāṃsy apa hanti dūram
asmiṃl loke śraddadhānena dattaḥ ||

etad vo jyotiḥ pitaras tṛtīyaṃ
pañcaudanaṃ brahmaṇe 'jaṃ dadāti |
ajas tamāṃsy apa hanti dūraṃ
pañcaudano brahmaṇe dīyamānaḥ ||

pañcaudano brahmaṇe dīyamāno
'jo nākam ā kramatāṃ tṛtīyam |
vicakramāṇaḥ sukṛtasya loke
sa jyotiṣā tamo apa hanti dūram ||

ajā kramasva sukṛtāṃ yatra lokaḥ
śarabho nu catto ati durgāṇi neṣataḥ |
pañcaudano brahmaṇe dīyamāno
viśvarūpā kāmadughāsy ekā ||