Paippalāda-Saṃhitā · Chapter 16.91

sahasrapṛṣṭhaḥ śatadhāro akṣito
brahmaudano devayānaḥ svargaḥ |
amūṃs ta ā dadhāmi prajayā reṣaya -
-enaṃ balihārāya mṛḍatāṃ mahyam eva ||

ud ehi vediṃ prajayā vardhayainaṃ
nudasva rakṣaḥ prataraṃ dhehy enam |
śriyā samānān ati sarvānt syāma-
-adhaspadaṃ dviṣataḥ pādayema ||

ṛtena taṣṭā manasā hiteyaṃ
brahmaudanasya nihitā vedir agre |
aṃśadhrīṃ śuddhām upa dhehi nāri
tatraudanaṃ sādaya daivānām ||

aditer hastāṃ srucam etāṃ dvitīyāṃ
saptarṣayo bhūtakṛto yām akṛṇvan |
sā gātrāṇi viduṣy odanasya
darvir vedyām adhy enaṃ cinotu ||

śṛtaṃ tvā havir upa sīdantu daivā
nisṛpyāgne punar enaṃ pra sīda
somena pūto jaṭhare sīda brahmaṇām
ārṣeyās te mā riṣan prāśitāraḥ ||

soma rājan saṃjñānam ā vapaibhyaḥ
subrāhmaṇā yatame tvopasīdān |
ṛṣīn ārṣeyāṃs tapaso 'dhi jātān
brahmaudane suhavā johavīmi ||

imā āpo madhumatīr ghṛtaścyuto
brahmaṇāṃ hasteṣu pra pṛthak sādayāmi |
yatkāma idam abhiṣiñcāmi vo 'ham
indro marutvāṃs tad adād idaṃ me ||

idaṃ me jyotir amṛtaṃ hiraṇyaṃ
pakvaṃ kṣetrāt kāmadughā ma eṣā |
idaṃ dhanaṃ ni dadhe brāhmaṇeṣu
kṛṇve panthāṃ pitṛṣu yaḥ svargaḥ ||

agnau tuṣām̐ ā vapa jātavedasi
paraḥ kambūkān upa mṛḍhy etān |
etaṃ śuśruma gṛharājasya bhāgam
atho vidma nirṛter bhāgadheyam ||

śrāmyataḥ pacata edhi sunvataḥ
svargaṃ lokam adhi rohayainam |
yena rohāt param āpadya yad vayaḥ ||