Paippalāda-Saṃhitā · Chapter 16.90

upaśvase druvaye sīdatā yūyaṃ
vi vicyadhvaṃ yajñiyāsas tuṣaiḥ |
śriyā samānān ati sarvānt syāma-
-adhaspadaṃ dviṣatas pādayema ||

iyaṃ te dhītir idam u te janitraṃ
gṛhṇātu tvām aditiḥ śūraputrā |
parā punīhi ya imāṃ pṛtanyavo
asmai rayiṃ sarvavīraṃ ni yaccha ||

parehi nāri punar ehi kṣipram
apāṃ tvā goṣṭho adhy arukṣad bharāya |
tāsāṃ gṛhṇītād yatamā yajñiyā
asan vibhājya dhīrītarā jihītāt ||

emā agur yoṣitaḥ śumbhamānā
ut tiṣṭha nāri tavasaṃ rabhasva |
supatnī patyā prajāvatyā tvā-
- agan yajñaḥ prati kumbhaṃ gṛbhāya ||

ūrjo bhāgo nihito yaḥ purā va
ṛṣipraśiṣṭāpa ā haraitāḥ |
ayaṃ yajño nāthavid gātuvit prajāvid
ugraḥ paśumad vīravid vo astu ||

agne carur yajñiyas tvādhy arukṣac
chucis tapiṣṭhas tapasā tapainam |
ārṣeyā daivā abhisaṃgatya bhāgam
imaṃ tapiṣṭhā ṛtubhis tapantu ||

śuddhā āpo yoṣito yajñiyā imā
āpaś carum iva sarpantu śubhrāḥ |
dadat prajā bahulān paśūn me
paktaudanasya sukṛtām etu lokam ||

brahmaṇā śuddhā uta pūtā ghṛtena
somasyāṃśavas taṇḍulā yajñiyā ime |
apaḥ pra viśatu prati gṛhṇātu vaś
carur imaṃ paktvā sukṛtām etu lokam ||

abhyāvartasva prajayā sahaināṃ
pratyaṅ enaṃ devatābhiḥ sahaidhi |
svargaṃ lokam abhi saṃ vahainam
ādityo devaḥ paramaṃ vyoma ||

uruḥ prathasva mahatā mahimnā
sahasrapṛṣṭhaḥ sukṛtasya loke |
pitāmahāḥ pitaraḥ prajopaja-
-ahaṃ paktvā pañcadaśas te asmi ||