Scripture Library

Paippalāda-Saṃhitā · Chapter 16.86

16.86.1

kutaḥ keśān kutaḥ snāva
kuto asthīny ābharat |
aṅgā parvāṇi majjānaṃ
ko māṃsaṃ kuta ābharat ||

16.86.2

yadā keśān asthi snāva
māṃsaṃ majjānam ābharat |
śarīraṃ kṛtvā pādavat
kaṃ lokam anu prāviśat ||

16.86.3

saṃsico nāma te devā
ye saṃbhāraiḥ samabharan |
sarvaṃ saṃsicya martyaṃ
devāḥ puruṣam āviśan ||

16.86.4

śiro hastāv atho bāhū
jihvāṃ grīvāś ca kīkasāḥ |
pṛṣṭīr barjahye pārśve
kas tat sam adadhād ṛṣiḥ ||

16.86.5

ūrū pādāv aṣṭhīvantau
śroṇī hastāv atho mukham |
tvacā prāvṛtya tat sarvaṃ
saṃdhā sam adadhān mahī ||

16.86.6

yat tac charīram apayat
saṃdhayā saṃhitaṃ mahat |
yenedam adya rocate
ko asmin varṇam ābharat ||

16.86.7

sarve devā upāśikṣan
tad u jānād vadhūḥ satī |
īśā vaśasya yā jāyā
sāsmin varṇam ābharat ||

16.86.8

yadā tvaṣṭā vyatṛṇat
pitā tvaṣṭur ya uttaraḥ |
gṛhaṃ kṛtvā martyaṃ
devāḥ puruṣam āviśan ||

16.86.9

svapno vai tandrīr nirṛtiḥ
pāpmāno nāma devatāḥ |
jarā khālityaṃ pālityaṃ
śarīram anu prāviśan ||

16.86.10

steyaṃ duṣkṛtaṃ vṛjinaṃ
satyaṃ yajño yaśo mahaḥ |
balaṃ ca kṣatram ojaś ca
śarīram anu prāviśan ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0