Paippalāda-Saṃhitā · Chapter 16.70
dyaur javenā pṛthivī varimṇāntarikṣaṃ mahitvāpo bhūmnā |
devasya tvā savituḥ prasave 'śvinor bāhubhyāṃ pūṣṇo hastābhyāṃ
prasūto brāhmaṇebhyo nir vapāmi ||
ṛṣibhyas tvā rṣeyebhyas tvā (nir vapāmi) ||
juṣṭatamaṃ vahnitamaṃ papritamaṃ sasnitamam
ūrjo bhāgam akṣitam akṣitaye nir vapāmi ||
vasavas tvā gāyatreṇa chandasā nir vapantu ||
rudrās tvā traiṣṭubhena chandasā nir vapantu ||
ādityās tvā jāgatena chandasā nir vapantu ||
idam abhirāvṇām
idam abhigatvarāṇām
idam abhimanyūnām ||
yathā kūpaḥ śatakhāḥ sahasrakhā nopadasyati |
evedaṃ mopa dasat tīrtham aśvinor iva ||
yo no dveṣan manasā yaś ca vācā
daivye loka uta mānuṣe yaḥ |
grāvṇā hantu mahatā tasya sarvam
indro devo maghavāñ chacīpatiḥ ||
vīrutsu vastraṃ parijāyaitad
ūrjā soma punar ā viśeha naḥ |
dṛṃhasva bāhvo amba dhṛṣva mā riṣo
agniś caitat saniṣyatha ||
devīr āpa ūrjo bhāgāya vo 'kṣitā
akṣitaya ā siñcāmi ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0