Paippalāda-Saṃhitā · Chapter 16.69

ya īṃ cakāra na so asya veda
ya īṃ dadarśa hirug in na tasmāt |
sa mātur yonā parivīto antar
bahuprajā nirṛtim ā viveśa ||

dyaur naḥ pitā janitā nābhir atra
bandhur no mātā pṛthivī mahīyam |
uttānayoś camvor yonir antar
atrā pitā duhitur garbham ādhāt ||

pṛcchāmi tvā param antaṃ pṛthivyāḥ
pṛcchāmi tvā bhuvanasya nābhim |
pṛcchāmi tvā vṛṣṇo aśvasya reto
vācaḥ pṛcchāmi paramaṃ vyoma ||

iyaṃ vediḥ paro antaḥ pṛthivyā
ayaṃ yajño bhuvanasya nābhiḥ |
ayaṃ somo vṛṣṇo aśvasya reto
brahmāyāṃ vācaḥ paramaṃ vyoma ||

saptārdhagarbhā bhuvanasya reto
viṣṇos tiṣṭhanti pradiśo vidharmaṇi |
te dhītibhir manasā te vipaścitaḥ
paribhuvaḥ pari bhavanti viśvataḥ ||

na vi jānāmi yad ivedam asmi
niṇyaḥ sannaddho manasā carāmi |
yadā māgan prathamajā ṛtasya-
-ād id vāco aśnuve bhāgam asyāḥ ||

apāṅ prāṅ eti svadhayā gṛbhīto
'martyo martyenā sayoniḥ |
tā śaśvantā viṣūcīnā viyantā
ny anyaṃ cikyur na ci cikyur anyam ||

ṛco akṣare parame vyoman
yasmin devā adhi viśve niṣeduḥ |
yas tan na veda kim ṛcā kariṣyati
ya it tad vidus ta ime sam āsate ||

ṛcaḥ padaṃ mātrayā kalpayanto
'rdharcena cākl̥pur viśvam ejat |
tripād brahma pururūpaṃ vi caṣṭe
tena jīvanti pradiśaś catasraḥ ||

sūyavasād bhagavatī hi bhūyā
atho vayaṃ bhagavantaḥ syāma |
addhi tṛṇam aghnye viśvadānīṃ
piba śuddham udakam ācarantī ||

gaurīr mimāya salilāni takṣaty
ekapadī dvipadī sā catuṣpadī |
aṣṭāpadī navapadī babhūvuṣī
sahasrākṣarā bhuvanasya paṅktis
tasyāḥ samudrā adhi vi kṣaranti ||

athāpād eti prathamā padvatīnāṃ
kas tad vāṃ mitrāvaruṇā ciketa |
garbho bhāraṃ bharaty ā cid asya
ṛtaṃ piparty anṛtaṃ ni pāti ||

kṛṣṇaṃ niyānaṃ harayaḥ suparṇā
apo vasānā divam ut patanti |
tā āvavṛtrant sadanād ṛtasya-
-ād id ghṛtena pṛthivīṃ vy ūduḥ ||