પૈપ્પલાદ-સંહિતા · અધ્યાય 16.69

ય ઈં ચકાર ન સો અસ્ય વેદ
ય ઈં દદર્શ હિરુગ્ ઇન્ ન તસ્માત્ ।
સ માતુર્ યોના પરિવીતો અન્તર્
બહુપ્રજા નિરૃતિમ્ આ વિવેશ ॥

દ્યૌર્ નઃ પિતા જનિતા નાભિર્ અત્ર
બન્ધુર્ નો માતા પૃથિવી મહીયમ્ ।
ઉત્તાનયોશ્ ચમ્વોર્ યોનિર્ અન્તર્
અત્રા પિતા દુહિતુર્ ગર્ભમ્ આધાત્ ॥

પૃચ્છામિ ત્વા પરમ્ અન્તં પૃથિવ્યાઃ
પૃચ્છામિ ત્વા ભુવનસ્ય નાભિમ્ ।
પૃચ્છામિ ત્વા વૃષ્ણો અશ્વસ્ય રેતો
વાચઃ પૃચ્છામિ પરમં વ્યોમ ॥

ઇયં વેદિઃ પરો અન્તઃ પૃથિવ્યા
અયં યજ્ઞો ભુવનસ્ય નાભિઃ ।
અયં સોમો વૃષ્ણો અશ્વસ્ય રેતો
બ્રહ્માયાં વાચઃ પરમં વ્યોમ ॥

સપ્તાર્ધગર્ભા ભુવનસ્ય રેતો
વિષ્ણોસ્ તિષ્ઠન્તિ પ્રદિશો વિધર્મણિ ।
તે ધીતિભિર્ મનસા તે વિપશ્ચિતઃ
પરિભુવઃ પરિ ભવન્તિ વિશ્વતઃ ॥

ન વિ જાનામિ યદ્ ઇવેદમ્ અસ્મિ
નિણ્યઃ સન્નદ્ધો મનસા ચરામિ ।
યદા માગન્ પ્રથમજા ઋતસ્ય-
-આદ્ ઇદ્ વાચો અશ્નુવે ભાગમ્ અસ્યાઃ ॥

અપાઙ્ પ્રાઙ્ એતિ સ્વધયા ગૃભીતો
ઽમર્ત્યો મર્ત્યેના સયોનિઃ ।
તા શશ્વન્તા વિષૂચીના વિયન્તા
ન્ય્ અન્યં ચિક્યુર્ ન ચિ ચિક્યુર્ અન્યમ્ ॥

ઋચો અક્ષરે પરમે વ્યોમન્
યસ્મિન્ દેવા અધિ વિશ્વે નિષેદુઃ ।
યસ્ તન્ ન વેદ કિમ્ ઋચા કરિષ્યતિ
ય ઇત્ તદ્ વિદુસ્ ત ઇમે સમ્ આસતે ॥

ઋચઃ પદં માત્રયા કલ્પયન્તો
ઽર્ધર્ચેન ચાક્લ્̥પુર્ વિશ્વમ્ એજત્ ।
ત્રિપાદ્ બ્રહ્મ પુરુરૂપં વિ ચષ્ટે
તેન જીવન્તિ પ્રદિશશ્ ચતસ્રઃ ॥

સૂયવસાદ્ ભગવતી હિ ભૂયા
અથો વયં ભગવન્તઃ સ્યામ ।
અદ્ધિ તૃણમ્ અઘ્ન્યે વિશ્વદાનીં
પિબ શુદ્ધમ્ ઉદકમ્ આચરન્તી ॥

ગૌરીર્ મિમાય સલિલાનિ તક્ષત્ય્
એકપદી દ્વિપદી સા ચતુષ્પદી ।
અષ્ટાપદી નવપદી બભૂવુષી
સહસ્રાક્ષરા ભુવનસ્ય પઙ્ક્તિસ્
તસ્યાઃ સમુદ્રા અધિ વિ ક્ષરન્તિ ॥

અથાપાદ્ એતિ પ્રથમા પદ્વતીનાં
કસ્ તદ્ વાં મિત્રાવરુણા ચિકેત ।
ગર્ભો ભારં ભરત્ય્ આ ચિદ્ અસ્ય
ઋતં પિપર્ત્ય્ અનૃતં નિ પાતિ ॥

કૃષ્ણં નિયાનં હરયઃ સુપર્ણા
અપો વસાના દિવમ્ ઉત્ પતન્તિ ।
તા આવવૃત્રન્ત્ સદનાદ્ ઋતસ્ય-
-આદ્ ઇદ્ ઘૃતેન પૃથિવીં વ્ય્ ઊદુઃ ॥