Paippalāda-Saṃhitā · Chapter 16.6

rakṣohaṇaṃ vājinam ā jigharmi
mitraṃ prathiṣṭham upa yāmi śarma |
śiśāno agniḥ kratubhiḥ samiddhaḥ
sa no divā sa riṣaḥ pātu naktam ||

ayodaṃṣṭrān arciṣā vāvṛdhānān
upa spṛśa jātavedaḥ samiddhaḥ |
ā jihvayā mūradevān rabhasva
kravyādo vṛṣṭvāpi dhatsvāsan ||

ubhobhayāvinn upa dehi daṃṣṭrā
hiṃsraḥ śiśāno 'varaṃ paraṃ ca |
utāntarikṣe pari yāhy agne
jambhaiḥ saṃ dhehy abhi yātudhānān ||

agne tvacaṃ yātudhānasya bhindhi
hiṃsrāśanir harasā hantv enam |
pra parvāṇi jātavedaḥ śṛṇīhi
kravyāt kraviṣṇur vi cinoty enam ||

yajñair iṣūḥ saṃnamamāno agne
vācā śalyām̐ aśanibhir dihānaḥ |
tābhir vidhya hṛdaye yātudhānān
pratīco bāhūn prati bhaṅdhy eṣām ||

yatredānīṃ paśyasi jātavedas
tiṣṭhantam agna uta vā carantam |
utāntarikṣe patantaṃ yātudhānaṃ
tamasā vidhya sarvā śiśānaḥ ||

utārabdhāc chṛṇīhi jātaveda
utārebhāṇād ṛṣṭibhir yātudhānāt |
agne pūrvo ni jahi śośucāna
āmādaḥ kṣviṅkās tam adantv enīḥ ||

iha pra brūhi yatamaḥ so agne
yo yātudhāno ya idaṃ śṛṇoti |
tam ā rabhasva samidhā yaviṣṭha
nṛcakṣasaś cakṣuṣe randhayaitam ||

tīkṣṇenāgne cakṣuṣā rakṣa yajñaṃ
prāñcaṃ vasubhyaḥ pra ṇaya pracetaḥ |
hiṃsraṃ rakṣāṃsy abhi śośucānaṃ
mā tvā dabhan yātudhānā nṛcakṣaḥ ||

nṛcakṣā rakṣaḥ prati paśya vikṣu
tasya trīṇi prati śṛṇīhy agrā |
tasyāgne pṛṣṭīr harasā śṛṇīhi
tredhā mūlaṃ yātudhānasya vṛśca ||