Scripture Library

Paippalāda-Saṃhitā · Chapter 16.5

16.5.1

śataṃ te 'yutaṃ hāyanā
dve yuge trīṇi catvāri santu |
indrāgnī viśve devā
anu manyantām ahṛṇīyamānāḥ ||

16.5.2

śarade tvā hemantāya vasantāya
griṣmāya pari dadhmasi |
varṣāṇi tubhyaṃ syonāni
yeṣu vardhanta oṣadhīḥ ||

16.5.3

mṛtyur īśe dvipadāṃ
mṛtyur īśe catuṣpadām |
tasmāt tvā mṛtyor gopater
ud dharāmi sa mā mṛthāḥ ||

16.5.4

so 'riṣṭa na mariṣyasi
na mariṣyasi mā bibheḥ |
na vai tatra pra mīyante
no yanty adharaṃ rajaḥ ||

16.5.5

sarvo vai tatra jīvati
gaur aśvaḥ puruṣaḥ paśuḥ |
yatredaṃ brahma kriyate
paridhir jīvanāya kam ||

16.5.6

pari tvā pātu samānebhyo
'bhicārāt sabandhubhyaḥ |
amamrir bhavāmṛto 'tijīvo
mā te hāsiṣur asavaḥ śarīram ||

16.5.7

viśve tvā devā amṛtena bibhratv
adhivaktā paśupatiṣ ṭe astu |
anāmayat savitā te kṛṇotv
ā tvā prāṇo viśatu jīvanāya ||

16.5.8

ye mṛtyava ekaśataṃ
yā nāṣṭrātijīvyā |
muñcantu tasmāt tvā devā
agner vaiśvānarād adhi ||

Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0