Paippalāda-Saṃhitā · Chapter 16.7

trir yātudhānaḥ prasitiṃ ta etv
ṛtaṃ yo agne anṛtena hanti |
tam arciṣā sphūrjayañ jātavedaḥ
samakṣam enaṃ gṛṇate ni vṛṅdhi ||

yad agne adya mithunā śapāto
yad vācas tṛṣṭaṃ janayanta rebhāḥ |
manyor manasaḥ śaravyā jāyate
yā tayā vidhya hṛdaye yātudhānān ||

parā śṛṇīhi tapasā yātudhānān
parāgne rakṣo harasā śṛṇīhi |
parārciṣā mūradevāñ chṛṇīhi
parāsutṛpaḥ śośucataḥ śṛṇīhi ||

parādya devā vṛjinaṃ śṛṇantu
pratyag enaṃ śapathā yantu sṛṣṭāḥ |
vācāstenaṃ śarava ṛcchantu marman
viśvayaitu prasitiṃ yātudhānaḥ ||

sanād agne mṛṇasi yātudhānān
na tvā rakṣāṃsi pṛtanāsu jigyuḥ |
anu daha sahamūrān kravyādo
mā te hetyā mukṣata daivyāyāḥ ||

yaḥ pauruṣeyeṇa kraviṣā samaṅkte
yo aśvyena paśunā yātudhānaḥ |
yo aghnyāyā bharati kṣīram agne
teṣāṃ śīrṣāṇi harasāpi vṛśca ||

saṃvatsarīṇaṃ paya usriyāyās
tasya māsīd yātudhāno nṛcakṣaḥ |
pīyūṣam agne yatamas titṛpsāt
taṃ pratyañcam arciṣā vidhya marman ||

viṣaṃ gavāṃ yātudhānāḥ pibantv
ā vṛścantām aditaye durevāḥ |
paraiṇān devaḥ savitā dadātu
parā bhāgam oṣadhīnāṃ jayantām ||

tvaṃ no agne adharād udaktas
tvaṃ paścād uta rakṣā purastāt |
prati tye te ajarāsas tapiṣṭhā
aghaśaṃsaṃ śośucato dahantu ||

paścāt purastād adharād udaktaḥ
kaviḥ kāvyena pari pāhy agne |
sakhā sakhāyam ajaro jarimṇe
agne martyām̐ amartyas tvaṃ naḥ ||