Paippalāda-Saṃhitā · Chapter 16.50

ihaiva santaḥ prati dadhma etaj
jīvā jīvebhyo ni harāma enat |
apamitya dhānyaṃ yaj jaghāsa-
-agnir mā tasmād anṛṇaṃ kṛṇotu ||

anṛṇā asminn anṛṇāḥ parasmin
tṛtīye nāke anṛṇāḥ syāma |
ye devayānā uta pitṛyāṇāḥ
sarvān patho anṛṇāḥ kṣayema ||

yad dhastābhyāṃ cakṛmā kilbiṣam
akṣam aktum upalipsamānāḥ |
ugraṃpaśye ugrajitau tad adya-
-apsarasām anu dattām ṛṇaṃ naḥ ||

ugraṃpaśye rāṣṭrabhṛtaḥ kilbiṣaṃ
yad akṣavṛttam anu dattaṃ nas tat |
ṛṇān no na ṛṇam ertsamāno
yamasya loke adhirajjur āyat ||

yasmā ṛṇaṃ yasya jāyām upaimi
yaṃ yācamāno abhyaimi devāḥ |
te vācaṃ vādiṣur mottarāṃ
mad devapatnī apsarasāv adhītam ||

yad adīvyann aham ṛṇaṃ kṛṇomy
adāsyann agna uta saṃgṛṇāmi |
vaiśvānaro adhipā no vasiṣṭha
ud in nayāti sukṛtasya lokam ||

vaiśvānaraḥ pāvayā naḥ pavitrair
yat saṃgaram abhidhāvāmy āśām |
anājānan manasā yācamāno
yat tatraino apa tat suvāmi ||

vaiśvānarāya prati vedayāma etad
yad gṛṇaṃ saṃgaro devatāsu |
sa etān pāśān vicṛtaṃ pra veda-
-atha pakvena saha saṃ bhavema ||

yad antarikṣaṃ pṛthivīm uta dyāṃ
yan mātaraṃ pitaraṃ vā jihiṃsima |
agnir mā tasmād enaso
gārhapatyaḥ pra muñcatu ||

bhūmir mātāditir no janitraṃ
bhrātāntarikṣam abhiśastyā naḥ |
dyaur naḥ pitā pitryāc chaṃ bhavāti
jāmim ṛtvā māva patsi lokāt ||