Paippalāda-Saṃhitā · Chapter 16.51
yatrā suhārdaḥ sukṛto madanti
vihāya rogaṃ tanvaḥ svāyāḥ |
aśloṇā aṅgair ahrutāḥ svarge
atrā paśyema pitarau ca putrān ||
viṣāṇā pāśām̐ adhi vi ṣyatu tvad
ya uttamā adhamā vāruṇā ye |
yad dāruṇā badhyase yac ca rajjvā
yad bhūmyāṃ badhyase yac ca vācā ||
udagātāṃ bhagavatī
vicṛtau nāma tārake |
prehāmṛtasya yacchatāṃ
pra yad baddhakamocanam ||
vi jihīṣva lokaṃ kṛṇu
baddhān muñcāsi baddhakam |
yonyā iva pracyuto garbhaḥ
pathaḥ sarvām̐ anu kṣayā ||
taṃ prajānan prati gṛhṇātu vidvān
prajāpatiḥ prathamajā ṛtasya |
asmābhir dattaṃ jarasaḥ parastād
acchinnaṃ tantum anu saṃ carema ||
tataṃ tantum anv eke caranti
yeṣāṃ dattam ayanaṃ pitryeṇa |
abandhv eke dadataḥ pra yacchān
dātuṃ cec chikṣān sa svarga eṣām ||
anvārabhethām anusaṃrabhethām
etaṃ lokaṃ śraddadhānāḥ sacante |
yad vāṃ pūrtaṃ praviṣṭam agnau
tasya guptaye dampatī saṃ śrayethām ||
devāḥ pitaraḥ pitaro devā |
yo 'smi so 'smi so 'yam asmi ||
sa pacāmi sa yajāmi sa yajate 'sya |
śaṃ ma iṣṭam astu śunaṃ śāntaṃ
śivaṃ kṛtaṃ tasmān mā yavam ||
nāke rājan prati tiṣṭha
tatraitat prati tiṣṭhatu |
viddhi pūrtasya no rājan
sa deva sumanā bhava ||
Original text: Paippalāda-Saṃhitā · Edition: Dipak Bhattacharya The Paippalāda-Saṁhitā of the Atharvaveda. Volume One, Consisting of the first fifteen Kāṇḍas Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume Two, Consisting of the sixteenth Kāṇḍa Calcutta The Asiatic Society Dipak Bhattacharya The Paippalāda-Saṁhitā of the Atharvaveda. Volume three, consisting of the Seventeenth and Eighteenth · Data entry Arlo Griffiths Thomas Zehnder Philipp Kubisch Duccio Lelli Alexander Lubotsky Carmen Spiers Michael Witzel · GRETIL (Göttingen) · CC BY-NC-SA 4.0