પૈપ્પલાદ-સંહિતા · અધ્યાય 16.50

ઇહૈવ સન્તઃ પ્રતિ દધ્મ એતજ્
જીવા જીવેભ્યો નિ હરામ એનત્ ।
અપમિત્ય ધાન્યં યજ્ જઘાસ-
-અગ્નિર્ મા તસ્માદ્ અનૃણં કૃણોતુ ॥

અનૃણા અસ્મિન્ન્ અનૃણાઃ પરસ્મિન્
તૃતીયે નાકે અનૃણાઃ સ્યામ ।
યે દેવયાના ઉત પિતૃયાણાઃ
સર્વાન્ પથો અનૃણાઃ ક્ષયેમ ॥

યદ્ ધસ્તાભ્યાં ચકૃમા કિલ્બિષમ્
અક્ષમ્ અક્તુમ્ ઉપલિપ્સમાનાઃ ।
ઉગ્રંપશ્યે ઉગ્રજિતૌ તદ્ અદ્ય-
-અપ્સરસામ્ અનુ દત્તામ્ ઋણં નઃ ॥

ઉગ્રંપશ્યે રાષ્ટ્રભૃતઃ કિલ્બિષં
યદ્ અક્ષવૃત્તમ્ અનુ દત્તં નસ્ તત્ ।
ઋણાન્ નો ન ઋણમ્ એર્ત્સમાનો
યમસ્ય લોકે અધિરજ્જુર્ આયત્ ॥

યસ્મા ઋણં યસ્ય જાયામ્ ઉપૈમિ
યં યાચમાનો અભ્યૈમિ દેવાઃ ।
તે વાચં વાદિષુર્ મોત્તરાં
મદ્ દેવપત્ની અપ્સરસાવ્ અધીતમ્ ॥

યદ્ અદીવ્યન્ન્ અહમ્ ઋણં કૃણોમ્ય્
અદાસ્યન્ન્ અગ્ન ઉત સંગૃણામિ ।
વૈશ્વાનરો અધિપા નો વસિષ્ઠ
ઉદ્ ઇન્ નયાતિ સુકૃતસ્ય લોકમ્ ॥

વૈશ્વાનરઃ પાવયા નઃ પવિત્રૈર્
યત્ સંગરમ્ અભિધાવામ્ય્ આશામ્ ।
અનાજાનન્ મનસા યાચમાનો
યત્ તત્રૈનો અપ તત્ સુવામિ ॥

વૈશ્વાનરાય પ્રતિ વેદયામ એતદ્
યદ્ ગૃણં સંગરો દેવતાસુ ।
સ એતાન્ પાશાન્ વિચૃતં પ્ર વેદ-
-અથ પક્વેન સહ સં ભવેમ ॥

યદ્ અન્તરિક્ષં પૃથિવીમ્ ઉત દ્યાં
યન્ માતરં પિતરં વા જિહિંસિમ ।
અગ્નિર્ મા તસ્માદ્ એનસો
ગાર્હપત્યઃ પ્ર મુઞ્ચતુ ॥

ભૂમિર્ માતાદિતિર્ નો જનિત્રં
ભ્રાતાન્તરિક્ષમ્ અભિશસ્ત્યા નઃ ।
દ્યૌર્ નઃ પિતા પિત્ર્યાચ્ છં ભવાતિ
જામિમ્ ઋત્વા માવ પત્સિ લોકાત્ ॥