Paippalāda-Saṃhitā · Chapter 16.49

yad devā devaheḍanaṃ
devāsaś cakṛmā vayam |
ādityās tasmān no yūyam
ṛtasyartena muñcata ||

ṛtasyārtenādityā
yajatrā muñcateha naḥ |
yajñaṃ yad yajñavāhasaḥ
śikṣanta upārima ||

medasvatā yajamānāḥ
srucājyena juhvataḥ |
akāmā viśve vo devāḥ
śikṣanto nopa śekima ||

yad vidvāṃso yad avidvāṃsa
enāṃsi cakṛmā vayam | [Bhatt. enāya
tasmān na iha muñcata
viśve devāḥ sajoṣasaḥ ||

yadi jāgrad yadi svapann
ena enasyo 'karam |
bhūtaṃ mā tasmād bhavyaṃ ca
drupadād iva muñcatām ||

drupadād iva mumucānaḥ
svinnaḥ snātvā malād iva |
pūtaṃ pavitreṇājyaṃ
viśvān muñcantu mainasaḥ ||

yad yāmaṃ cakrur nikhananto agre
kārṣīvaṇā na vido na vidyayā |
vaivasvate rājani taj juhomy
adhā yajñiyaṃ madhuman no astu ||

vaivasvataḥ kṛṇavad bheṣajāni
madhubhāgo madhunā saṃ sṛjāti |
mātur yad ena iṣitaṃ na āgan
yad vā pitāparāddho jihīḍe ||

yadīdaṃ mātur yadi vā pitur no
bhrātuḥ putrād reṣata ena āgan |
yāvanto asyāḥ pitaraḥ sacante
teṣāṃ sarveṣāṃ śivo astu manyuḥ ||

apamityam apratītaṃ yad asmi
yamasya yena balinā carāmi |
idaṃ tad agne anṛṇo bhavāmi
jīvann enaḥ prati dadāmi sarvam ||