Paippalāda-Saṃhitā · Chapter 16.4

kṛṇomi te prāṇāpānau
jarāṃ mṛtyuṃ kṛṇutāṃ dīrgham āyuḥ svasti |
vaivasvatena prahitān yamadūtāṃś
carata ārād apa sedhāmi sarvān ||

ārād arātiṃ nirṛtiṃ
paro grāhiṃ kravyādaḥ piśacān |
rakṣo yat sarvaṃ durbhūtaṃ
tat tama ivāpa hanmasi ||

agneṣ ṭe prāṇam amṛtād
āyuṣmato manave jātavedasaḥ |
yathā na riṣyā amṛtaḥ sajūr asas
tat te kṛṇomi tad u te sam ṛdhyatām ||

śive te stāṃ dyāvāpṛthivī
asantāpe adhiśriyau |
śaṃ te sūrya ā tapati
śaṃ vāto vātu te hṛde |
śivā abhi kṣarantu tvā-
-āpo divyāḥ payasvatīḥ
śivās te santv oṣadhīḥ ||

ut tvāhārṣam adharasyād
uttarāṃ pṛthivīm abhi |
tatra tvādityau rakṣatāṃ
sūryāś candramasā ubhā ||

yat te vāsaḥ paridhānaṃ
yāṃ nīviṃ kṛṇuṣe tvam |
śivaṃ te tanve tat kṛṇmaḥ
saṃsparśe 'dhrūkṣṇam astu te ||

yat kṣureṇa marcayatā sutejasā
vaptā vapasi keśaśmasru |
śumbhaṃ mukhaṃ mainam āyuḥ pra moṣīḥ ||

śivau te stāṃ vrīhiyavāv
abalāsāv adomadhau |
etau yakṣmaṃ vi bādhete
etau muñcato aṃhasaḥ ||

yad aśnāsi yat pibasi
dhānyaṃ kṛṣyāḥ payaḥ |
ādyaṃ yad anādyaṃ
sarvaṃ te annam aviṣaṃ kṛṇomi ||

ahne ca tvā rātraye ca-
-ubhābhyāṃ pari dadhmasi |
arāyebhyo jighatsubhya
imaṃ naḥ pari rakṣata ||