પૈપ્પલાદ-સંહિતા · અધ્યાય 16.5

શતં તે ઽયુતં હાયના
દ્વે યુગે ત્રીણિ ચત્વારિ સન્તુ ।
ઇન્દ્રાગ્ની વિશ્વે દેવા
અનુ મન્યન્તામ્ અહૃણીયમાનાઃ ॥

શરદે ત્વા હેમન્તાય વસન્તાય
ગ્રિષ્માય પરિ દધ્મસિ ।
વર્ષાણિ તુભ્યં સ્યોનાનિ
યેષુ વર્ધન્ત ઓષધીઃ ॥

મૃત્યુર્ ઈશે દ્વિપદાં
મૃત્યુર્ ઈશે ચતુષ્પદામ્ ।
તસ્માત્ ત્વા મૃત્યોર્ ગોપતેર્
ઉદ્ ધરામિ સ મા મૃથાઃ ॥

સો ઽરિષ્ટ ન મરિષ્યસિ
ન મરિષ્યસિ મા બિભેઃ ।
ન વૈ તત્ર પ્ર મીયન્તે
નો યન્ત્ય્ અધરં રજઃ ॥

સર્વો વૈ તત્ર જીવતિ
ગૌર્ અશ્વઃ પુરુષઃ પશુઃ ।
યત્રેદં બ્રહ્મ ક્રિયતે
પરિધિર્ જીવનાય કમ્ ॥

પરિ ત્વા પાતુ સમાનેભ્યો
ઽભિચારાત્ સબન્ધુભ્યઃ ।
અમમ્રિર્ ભવામૃતો ઽતિજીવો
મા તે હાસિષુર્ અસવઃ શરીરમ્ ॥

વિશ્વે ત્વા દેવા અમૃતેન બિભ્રત્વ્
અધિવક્તા પશુપતિષ્ ટે અસ્તુ ।
અનામયત્ સવિતા તે કૃણોત્વ્
આ ત્વા પ્રાણો વિશતુ જીવનાય ॥

યે મૃત્યવ એકશતં
યા નાષ્ટ્રાતિજીવ્યા ।
મુઞ્ચન્તુ તસ્માત્ ત્વા દેવા
અગ્નેર્ વૈશ્વાનરાદ્ અધિ ॥