Paippalāda-Saṃhitā · Chapter 16.3

ā rabhasvemām amṛtasya śnuṣṭim
acchidyamānā jaradaṣṭir astu te |
asuṃ ta āyuḥ punar ā bharāmi
rajas tamo mopa gā mā pra meṣṭhāḥ ||

jīvatāṃ jyotir abhy ehi lokam
ā tvā harāmi śataśāradāya |
drāghīya āyuḥ prataraṃ te kṛṇomy
ava muñcantu mṛtyupāśā aśastīḥ ||

vātāt te prāṇam avidaṃ
sūryāc cakṣur ahaṃ pari |
yat te manas tvayi tad dhārayāmi
saṃ vitsvāṅgair vada jihvayālapan ||

prāṇena tvāṃ dvipadāṃ catuṣpadām
agnim iva jātam abhi saṃ dhamāmi |
namas te mṛtyo cakṣuṣe
namaḥ prāṇāya te 'karam ||

ayaṃ jīvatu mā mṛta-
-imaṃ sam īrayāmasi |
kṛṇomy asmai bheṣajaṃ
mṛtyo mā puruṣaṃ vadhīḥ ||

jīvalāṃ naghāriṣāṃ
jīvantīm oṣadhīm aham |
trāyamāṇāṃ sahamānāṃ
sahasvatīm arundhatīm
iha huve 'smā ariṣṭatātaye ||

adhi brūhi mā rabhathāḥ sṛjemaṃ
tavaiva sant sarvahāyā ihāstu |
bhavāśarvau mṛḍataṃ śarma yacchatam
apasidhya duritaṃ dhattam āyuḥ ||

devānāṃ hetiḥ pari tvā vṛṇaktu
pārayāmi rajasa ut tvā mṛtyor apīparam |
ārād agniṃ kravyādaṃ nirūhan
jivātave te paridhiṃ dadhāmi ||

asmai mṛtyo adhi brūhi -
-imaṃ dayasvod ito 'yam etu |
ariṣṭaḥ sarvāṅgaḥ suśruj jarasā
śatahāyanātmanā bhujam aśnavat ||

yat te niyānaṃ rajasaṃ
mṛtyo anavadhariṣyam |
patha imaṃ tasmād rakṣanto
brahmāsmai varma kṛṇmasi ||