Paippalāda-Saṃhitā · Chapter 16.36

yat te pitṛbhyo dadato
yajñe vā nāma jagṛhuḥ |
saṃdeśyāt sarvasmāt pāpād
imā muñcantu tvauṣadhīḥ ||

devainasāt pitryān nāmagrāhāt
saṃdeśyād abhiniṣkṛtāt |
muñcantu tvā vīrudho vīryeṇa
brahmaṇa ṛgbhiḥ payasa ṛṣīṇām ||

yathā vātaś cyāvayati bhūmyā
reṇum antarikṣāc cābhram |
evāsmat sarvaṃ durbhūtaṃ
brahmanuttam apāyati ||

apa krāma nānadatī
vinaddhā gardabhīva |
kartṝn nakṣasveto nuttā
brahmaṇā vīryāvatā ||

ayaṃ panthāpi nayāmi tvā kṛtye
prahitāṃ prati tvā pra hiṇmaḥ |
tenābhi yāhi bhuñjaty anasvatīva
vāhinī viśvarūpā kurūṭinī ||

parāk te jyotir apathaṃ te arvāg
anyatrāsmad ayanā kṛṇuṣva |
pareṇehi navatiṃ nāvyā ati
durgā srotyā mā kṣaniṣṭhāḥ parehi ||

vāta iva vṛkṣaṃ ni mṛṇīhi pādaya
mā gām aśvaṃ puruṣam uc chiṣa eṣām |
kartṝn nivṛtyetaḥ kṛtye
aprajāstvāya bodhaya ||

yāṃ te cakrur barhiṣi yāṃ śmaśāne
kṛtyāṃ kṣetre valagaṃ vā nicakhnuḥ |
agnau vā tvā gārhapatye 'bhiceruḥ
pākaṃ santaṃ dhīratarā anāgasaṃ
tad ito nāśayāmasi ||

upāhṛtam anubuddhaṃ nikhātaṃ
vairaṃ tsāry anv avidāma kartṝn |
tad etu yata āgataṃ tatrāśva iva
vartatāṃ hantu kṛtyākṛtaḥ prajām ||

svāyasā asayaḥ santi no gṛhe
vidma te kṛtye yatidhā parūṃṣi ||